.webp){kind=icon}
Ниту државата ниту општините не се ги собираат парите што планирале да си ги соберат. Државата заклучно со 31 мај остана покуса за 80 милиони евра, затоа што Законот за солидарниот данок не ги помина собраниските филтри. Сепак, министерот Бесими вели дека државата не се откажува од овие пари и апелира Собранието да ги донесе законите. Апелираше и во февруари.
Има општини што губат пари колку за една нова градинка затоа што не можат да си ја соберат главната изворна давачка – данокот на имот. Проблемот е административен, ама ги остава без пари.
Инфлацијата сите ги остави со помалку пари, но сиромашните повеќе. Истражувањата покажуваат дека сиромашните се попогодени од растот на цените затоа што најголем дел од своите скромни буџети трошеа на храна и енергенти – тоа што најмногу поскапуваше. Поддршка за зголемување на јазот дадоа и владините мерки, кои не беа насочени кон најсиромашните, туку кон сите.
Од вчера заврши уште една од мерките за контрола на инфлацијата – се одмрзнаа цените на овошјето и зеленчукот. Одлуката е донесена затоа што на пазарот некои од овие производи се продаваат и под цената што ја утврди државата поради зголемената понуда.
Имаме и струја вишок, и тоа прекуден поради фотоволтаиците, па се очекува од идниот месец да се врати евтината струја прекуден. Дали ќе поскапи енергентот и колку ДДВ ќе плаќаме, допрва ќе видиме.
Но знаеме дека повеќе плаќаме за кредитите. Каматите растат, забележува НБРМ, а нашите аналитичари велат дека трендот ќе трае подолго. Првиот човек на НБГ во ексклузивно интервју за „Блумберг Адрија“ вели дека циклусот монетарно затегнување што го предводи Европската централна банка се ближи кон крајот. Анализиравме и каква е ликвидноста на банкарскиот систем во земјава. Констатацијата е дека по ланската паника, показателите се вратија во нормала и, и покрај затегнувањето, банките имаат пари за кредитирање.
На планот на странските директни инвестиции (СДИ), годинава почнала полошо од лани. Во првиот квартал СДИ се за 10 милиони евра пониски од истиот период лани. Како ќе се одвиваат работите понатаму и дали германската рецесија може дополнително да ги замрси работите? Нашата анализа покажа дека ако рецесијата остане само на германско тло, не се очекува поголем потрес. Но ако забават економиите во повеќе европски земји, ќе бидат потребни нови планови.
Од земјава не се извезуваат само делови за автомобили туку и производи што ќе патуваат на Марс и на Месечината. Веле Самак во интервју за Блумберг Адрија ТВ зборува за соработката на прилепски „Микросам“ со НАСА.
