Деспотовски: Словенечка компанија влегува во ТИРЗ

Продолжува трендот на пораст на работните места во индустриските зони, вели во интервју за „Блумберг Адрија“ Јован Деспотовски, директор на ТИРЗ, анализирајќи ги податоците заклучно со 31 мај годинава.

„Само во мај во ТИРЗ бројот на нови работни места е зголемен за 1,5 отсто, а вкупниот број на нови работни места од почетокот на годинава е близу 700, што значи дека има раст од 5 отсто, што е рекордно ниво“, посочи Деспотовски.

Во однос на тоа што компанијата „Магна“ замина од Словенија и треба да ги враќа субвенциите, Деспотовски вели дека не очекува тоа да биде случај во Македонија. „Магна“ работи во Струга и вработува повеќе стотици луѓе, а производството и динамиката на инвестицијата се во согласност со договорот од пред две години. Неодамна групацијата започна со градба на нов капацитет во Штип и веќе се очекува тест-производство на крајот на годинава. 

Деспотовски смета дека недостигот од работна сила во Словенија е клучна причина „Магна“ да замине оттаму и да оди во Австрија, но во Македонија веќе се разговара и со универзитетите од Штип, кои гарантираат дека ќе има доволно човечки ресурси за да се реализира инвестицијата.

Според Деспотовски, обемот на постигнати договори во последните две и пол години во рамките на ТИРЗ достигна некаде околу 900.000 милиони евра.

„Она што ме радува мене е што бројот на нови работни места веќе надминува 4.000 креирани во овие две и пол години, тоа е повеќе од една третина над онаа бројка што ја затекнавме во 2021 година“, вели Деспотовски.

Тој најавува две странски инвестиции што ќе се објават до крајот на јуни, со што вели дека целта од една милијарда евра на постигнати нови договори за инвестиции ќе се изедначи со сето она што е постигнато во изминатите десет години, односно во периодот од 2010 до 2021 година. Деспотовски нагласи и дека компанија од Словенија наскоро ќе објави дека влегува во ТИРЗ.