Што се случи во Русија за време на викендот? Евгениј Пригожин тргна на Москва, стигна на 200 километри од руската престолнина, па по разговорите со стариот пријател на Путин, белорускиот претседател Александар Лукашенко, се врати назад. Сега остануваат многу отворени прашања, но тие нема да бидат одговорени баш денеска, затоа што во Москва денеска е неработен ден.
Добро утро, ова се петте вести што треба да ги знаете за почеток на денот.
Ова е почетокот на крајот на Путин
Поранешниот руски премиер Михаил Касјанов во изјава за Би-би-си оцени дека бунтот на платеничката група „Вагнер“ го означил „почетокот на крајот“ за рускиот претседател Владимир Путин.
Касјанов, кој беше премиер на Русија од 2000 до 2004 година и кој е гласен критичар на Путин, вели дека рускиот претседател е во „многу голема неволја“ во моментов.
Bloomberg
Мицотакис во убедливо водство во Грција
Кај јужниот сосед се гласаше вторпат за еден месец. За разлика од претходниот пат, кога никој не успеа да формира влада, сега убедлива победа освоија Кирјакос Мицотакис и неговата партија Неа демократија.
По вчерашните избори, извесно е дека во грчкиот парламент ќе влезат и нови партии, меѓу кои и една поддржана од осуден поранешен член на Златна зора.
Цените на суровините конечно тргнаа надолу
Цените на суровините конечно забавија во 2023 година, главно поради потоплата зима што влијаеше на цените на енергијата, црноморската иницијатива за жито и послабата побарувачка од главните економии во светот.
Кај некои суровини цените се придвижија во спротивна насока, на пример кај шеќерот, а под влијание на лошите временски услови. Но севкупно целиот пазар забележа пад, што влијаеше врз намалување на инфлациските притисоци, посочуваат од аналитичкиот тим на „Блумберг Адрија“ во новата анализа на трендовите на пазарот на суровини, објавена на „Блумберг Адрија инсајт“.
Во земјава казнените камати се највисоки во последните 13 години
Во согласност со мерките на НБРМ за монетарно затегнување за намалување на инфлацијата, каматата на благајничките записи се искачи на шест отсто, а тоа значи дека од 1 јули и казнената камата ќе изнесува исто толку, или најмногу во последните 13 години.
Казнена или затезна камата се плаќа за секое задоцнето плаќање за рата за картичка, кредит или сметки за режиски трошоци. Задоцнето плаќање е секое плаќање по истекот на 30 дена од денот на достасување.
Блумберг Адрија
Кому до што му е? На Маск и Закерберг им е до „ферка“
Илон Маск во кратки забелешки преку Твитер спејсес (Twitter Spaces) рече дека предложениот меч во ринг со Марк Закерберг „всушност би можел да се случи“.
Маск, најбогатиот човек на светот, го предизвика извршниот директор на „Мета“ (Meta Platforms Inc.) претходно оваа недела, на што Закерберг одговори така што побара место за мечот. Овој потег доаѓа по навестувањата дека „Мета“ ќе лансира потенцијален ривалски сервис на Твитер.
.webp){kind=icon}
