„’ЕВН хоум’ е повикана на 1 декември да испорача дневна евтина тарифа на струјата за сите, а како ќе го направат тоа е нивна надлежност и одговорност“, рече денеска вицепремиерот за економски прашања Фатмир Битиќи.
Според него, оперативните работи треба да ги направат тие што се повикани за тоа.
„Фактот дека Регулаторната комисија за енергетика (РКЕ) излезе со цени што се аплицираат од 1 јули до крајот на годината и со самото кажување дека на 1 декември треба да стартува евтината дневна тарифа, оперативните работи треба да ги направат тие што се повикани за тоа. Можам да им дадам помош на ’ЕВН хоум’ ако немаат, ќе одам лично да ги сетирам броилата, ако е тоа проблемот“, истакна Битиќи, одговарајќи на новинарски прашања.
Претходно од ЕВН објаснија дека на евтина струја прекуден од први декември ќе можат да се надеваат само околу 170 илјади домаќинства што имаат дигитални броила. За преостанатите 650 илјади што имаат стари струјомери ќе треба да помине одреден период, за рачно да се програмираат. Од ЕВН објаснуваат дека на први декември ќе стапи во сила новиот тарифен систем и претходно не може да се прави приспособување на броилата, затоа што тоа би било против законот. Тие истакнуваат дека и досега за вакви одлуки, кои ги носела која било влада, бил потребен период на адаптација, бидејќи физички е невозможно во еден ден да се направи промена на сите броила.
„Од први декември ќе стапи во сила новиот тарифен систем. Дотогаш ЕВН ќе ги направи сите технички подготовки, софтверски испитувања и слично. Од 1 декември ќе се започне со приспособување на броилата на терен“, велат од ЕВН.
Дневната евтина тарифа ќе се применува во периодот од 13 до 15 часот. Ваквата поволност беше укината пред повеќе од една година поради енергетската криза.
Од први овој месец граѓаните добија и нова цена за електричната енергија во сите четири блока, а сметките ќе бидат и со зголемен ДДВ, кој сега, наместо 10, изнесува 18 отсто.
.webp){kind=icon}
