.webp){kind=icon}
Како еден вид пандемиски синдром ги дефинира Народната банка трендовите на раст на цените на недвижностите во земјава и забрзувањето на станбеното кредитирање во последниот период. Во услови на пандемија, велат за Bloomberg Adria од НБМ, а при ниски приноси на штедењето, олеснет пристап до финансии, воздржаност во трошењето и порастот на заштедите во пандемија, побарувачката за недвижен имот бележеше раст, а тоа продолжи и по стишувањето на здравстевниот притисок. Сепак оттаму се децидни дека нема поголемо нарушување на рамнотежата или поголемо прегревање на овој пазарен сегмент.
„Нашите анализи покажуваат дека засега растот на цените на пазарот на недвижности е конзистентен со промените во понудата и побарувачката, и досега не укажуваат на поголемо нарушување на рамнотежата или поголемо „прегревање” на овој пазарен сегмент. Станбеното кредитирање е еден од изворите на финансирање на побарувачката за станови, а показателите за неговиот квалитет остануваат солидни, велат од Народната банка.
Во првиот квартал годинава, нефункционалните кредити кај станбените кредитни производи е 0,6 отсто. Ова според централната банка генерално укажува на релативно прудентни стандарди и практики на кредитирање од страна на банките и финансиска дисциплина на должниците.
Сепак додаваат дека во услови кога ценовниот раст на пазарот на недвижности забрзува, поддржан и од општиот пораст на трошоците во градежништвото, а забрзување на растот бележат и станбените кредити, овој пазарен сегмент внимателно го следат и прават детални анализи.
„Затегнувањето на монетарната политика се очекува да делува и на одредено забавување на кредитното финансирање, вклучително и на станбените кредити. Но, доколку следењето на трендовите и анализите покажат дека е потребно, ќе бидат преземени и други поцелни макропруденти мерки, преку коишто би се превенирале поголеми ризици и би се зајакнал капацитетот на банкарскиот систем за справување со истите, велат од Народната банка.
