.webp){kind=icon}
Пад на индустриското продизводство на месечно ниво и забавен раст на годишно ниво регистрира Државниот завод за статистика. Според податоците објавени во четвртокот индустријата пораснала во јули годинава за еден отсто споредено со истиот месец лани. Во јуни беше регистриран годишен раст од 3,7 проценти, во мај од 6,7 отсто, што упатува на забавување и надолен тренд на производството. Во јули во споредба со јуни е регистриран минимален пад од 0,8 проценти.
Најголем пад на индустриското производство е регистриран во секторот Рударство и вадење на камен и тоа од 13,5 проценти, додека преработувачката индустрија бележи опаѓање од 1,2 проценти. Раст од 8,8 проценти е измерен во секторот Снабдување со електрична енергија, гас, пареа и климатизација.
Од Државниот завод за статистика велат дека намалувањето во секторот Преработувачка индустрија е резултат, пред сѐ, на намаленото производство во повеќе оддели но најмногу кај производство на прехранбените производи, на тутунските производи, текстилот, облека, но и основни фармацевтски производи и фармацевтски препарати.
Според главните индустриски групи, производството во јули 2023 година, во однос на јули 2022 година, бележи пораст кај Капитални производи за дури 28 проценти, додека пад има кај Енергија за 6,1 отсто.
Инаку, во текот на минатата година сите земји од регионот Адрија, освен Македонија, забележаа раст на индустриското производство, иако со побавно темпо. Податоците покажуваат дека земјите во регионот произведуваат повеќе отколку во претпандемиската 2019 година, а Македонија, како единствен исклучок, објави за 8,5 проценти помало производство во однос на таа година.
