.webp){kind=icon}
Од утре, па до 30 ноември годинава, 25 категории на производи, односно стотици прехранбени производи, ќе имаат за најмалку 10 отсто пониски цени отколку што имале на 1 август годинава. Тоа го овозможува Одлуката за определување на највисоките цени во трговијата на мало што денеска на седница ја донесе Владата, а за овие производи трговците ќе имаат обврска да ги обележат со натписот „гарантирана цена“.
Како што најави денеска министерот за економија Крешник Бектеши, листата на производи која е утврдена денеска ќе стапи во сила откако ќе биде објавена во Службен весник и ќе биде обврска за сите трговци на мало. Листата во наредниот период најверојатно ќе се проширува, а со моменталната листа, посочи, целокупната инфлација во делот на храната би паднала за 4 до 5 отсто. Повтори дека очекува инфлацијата во делот на храната која моментално е 10 отсто до крајот на годинава да падне на 5 отсто.
Листа на производи/Министерство за економија
„Намалување на цените на овие 25 категории производи нема да има за постојните, туку за цените што ги имале на 1 август годинава. Тие цени од 1 август дополнително треба да бидат намалени за минимум 10 отсто. Доколку од 1 август досега биле драстично зголемени цените за некој од овие производи тоа би можело да значи намалување на цената и за 30 до 40 отсто. Трговците за вршење дејност производство и трговија на големо за овие производи треба да одобруваат рабат и други надоместоци кон трговците на мало во висина до 5 отсто и не повеќе. Трговците на мало за овие производи кога ќе бидат поставени на полиците треба да ги обележат со натписот „гарантирана цена“ што е објавен на веб-страницата на Министерството за економија и веќе е споделен со сите синџири на супермаркети, рече Бектеши на денешната прес-конференција во Владата.
Трговците на големо и производителите вклучувајќи ги и увозниците и дистрибутерите, додаде, дополнително имаат обврска да го снабдуваат пазарот со најмалку 70 отсто од количините на истите производи што ги снабдувале во август годинава.
Министерство за економија
„Денеска е направена мала корекција во делот на акциите со која ќе им се дозволи на трговците на мало да можат да прават акции со пониски цени од цените што се замрзнати со денешната одлука на Владата. Дополнително сите трговци на мало и сите синџири на супермаркети ќе имаат обврска во случај да прават намалување на одредени цени заради истек на рок тоа да го означат за да им биде јасно на граѓаните кои купуваат што таксативно е наведено во одуката за акции, рече Бектеши.
Казната за непочитување на мерките како што прецизира може да оди и до забрана за вршење на дејност во зависност од тежината на прекршокот, а ќе ја спроведува Државниот пазарен инспекторат (ДПИ). За таа цел во текот на наредната недела во вторник, како што кажа, ќе се зголемат ингеренциите на ДПИ, кој и сега има простор за тоа бидејќи Министерството за економија даде такво толкување на Законот за кој е надлежно.
