Од утре скопјани ќе плаќаат повисоки сметки за парно. Регулаторната комисија за енергетика донесе одлука за зголемување на парното греење за 4,51 отсто, појаснувајќи дека цената за граѓаните останува стабилна. Барањата за зголемување на цената доставени до РКЕ биле над 50 отсто, а од нив биле прифатени само 4,51 отсто.
„Со овие одлуки цената за граѓаните останува во опсег стабилна, а трите компании на ЕСМ за снабдување, дистрибуција и производство на топлинска енергија се практично принудени што побрзо да го стават во функција топловодот ’Беласица’ за системот да работи економично и во целост да ја користи топлинската енергија од ТЕ-ТО. Со работата на ТЕ-ТО и функционирањето на топловодот ’Беласица’, просечна сметка за топлинска енергија изнесува 1.800 денари, без работа на ТЕ-ТО е 2.800 денари, што е разлика во цената од 60 отсто“, изјави Марко Бислимоски, претседател на РКЕ.
Depositphotos
Со топлинска енергија се снабдуваат 64.000 домаќинства. Одлуката за новата цена требаше да биде донесена во август годинава, но беше одложена поради оштетувањето на топловодот на мостот „Беласица“, кој беше опожарен и се чекаше истиот да биде саниран. Вообичаено РКЕ носи две одлуки за парното годишно, првата на почетокот на август, а втората во декември. Годинава, како што кажа Бислимоски, ќе донесат само една одлука за цената, која ќе важи во текот целата година. Во реоните каде што има парно греење трафостаниците не се димензионирани за греење со електрична енергија, поради што Бислимоски очекува да продолжи субвенционирањето на цената на греењето од страна на Владата.
Со одлуката за новата цена треба да се вратат и шесте милиони евра што во јануари 2022 година ги даде Владата за набавка на природен гас за потребите на парното греење во Скопје.
.webp){kind=icon}
