.webp){kind=icon}
На денешната аукција се запишаа граѓански обврзници во износ од 1.085.480.000 денари (17,7 милиони евра), што е за 1,8 пати повеќе од износот објавен во проспектот за втората емисија на граѓанска обврзница, информираат од Министерството за финансии.
„Ова покажува дека граѓанската обврзница веќе е препознатлива од страна на граѓаните и дека го најде своето место на пазарот. По првата емисија, на која интересот беше поголем за 2,4 пати од објавениот износ, интересот продолжи и во втората емисија, а граѓаните веќе се интересираат за тоа кога ќе има нова емисија“, рече министерот за финансии Фатмир Бесими.
Тој додаде дека граѓаните што овој пат одлучија да ги инвестираат своите пари во граѓанска обврзница, приносот или добивката од нивниот влог за првата година ќе го добијат на 14 ноември 2024 година, а приносот за втората година на 14 ноември 2025 година, кога ќе им биде вратен и целиот инвестиран износ.
Прочитај повеќе
Втора емисија на граѓанска обврзница со камата од 5 отсто
Министерството за финансии денеска го објави Проспектот за втората емисија граѓански обврзници на износ од 600 милиони денари.
18.10.2023
„Граѓанската обврзница им нуди на граѓаните сигурност и безбедност за вложените пари, како и атрактивна камата, преку која ја заштитуваат вредноста на парите. Од друга страна, инвестираат и во развојот на државата, затоа што парите добиени од граѓанската обврзница, како и другите обврзници што се предвидени со планот за забрзан раст и со стратегијата за управување со јавен долг, се насочени во реализација на развојни проекти“, потенцира Бесими.
На денешната аукција граѓански обврзници запишаа 907 граѓани. Во наредните денови следува процесот на запишување на граѓанските обврзници во Централниот депозитар за хартии од вредност.
Проспектот за втората емисија граѓанска обврзница беше објавен на 18 октомври. Граѓаните можеа да поднесат барање за учество на аукцијата од 18 октомври до 6 ноември преку сите деловни банки во земјава.
