.webp){kind=icon}
Македонската економија годинава ќе бележи раст од 1,9 отсто, а за следната година раст од три отсто. Народната банка го усвоен кварталниот извештај во чии рамки се вклучени и макроекономските проекции. Во однос на растот, и натаму се очекува умерено забавување во 2023 година и негово постепено засилување во следниот период. Сепак, во услови на малку понеповолно надворешно окружување, на краток рок, закрепнувањето на економијата е малку послабо од претходните очекувања.
„На среден рок се очекува натамошно закрепнување, односно раст од околу четири отсто, под услов да нема позначителни шокови. Во поглед на структурата на растот, за 2023 година се очекува позитивен придонес од нето-извозот и од домашната побарувачка, додека за следните две години се очекува дека растот ќе произлезе од домашната побарувачка, со најголем позитивен придонес од бруто-инвестициите, заради засилената изведба на капиталните инфраструктурни проекти поврзани со изградбата на патните коридори и приватните домашни и странски инвестиции“, изјави гувернерката на Народната банка, Анита Ангеловска-Бежоска.
Во однос на инфлацијата се очекува дополнително забавување на просечната инфлација, која за целата 2023 година би изнесувала околу 9,5 отсто. Стапката на инфлацијата во 2024 година се очекува да биде во просек од 3,5 отсто до четири отсто.
Народна банка
„Кредитниот раст на крајот на 2023 година ќе биде на ниво од 5,7 отсто, додека со постепеното забрзување на економскиот раст и стабилизирањето на очекувањата, се очекува забрзување на растот на кредитната активност за периодот 2024 ‒ 2026 на 6,9 отсто во просек. Со оглед на попривлечните услови за штедење, како одраз на мерките преземени од страна на Народната банка и зголемената доверба во домашната валута, како и очекуваниот раст на паричните примања на населението, на крајот на 2023 година се очекува солиден раст на вкупните депозити од 8,4 отсто, повисок од очекувањата во април“, изјави Бежоска.
За 2023 година дефицитот во тековната сметка на билансот на плаќања би изнесувал 1,2 отсто од БДП. Значителното стеснување на дефицитот произлегува од пониските цени на енергијата и храната, но и на понискиот количински увоз на суровини и енергенти, во услови кога сѐ уште има високи резерви од претходната година. За 2024 година се предвидува мало влошување на дефицитот кај тековната сметка, кој би изнесувал 2,4 отсто од БДП. Се очекува дека во целиот период на проекцијата девизните резерви ќе се задржат на ниво што е соодветно на меѓународните стандарди за одржување на стабилноста на девизниот курс. Од Народната банка посочуваат дека макроекономската слика во поглед на патеката на економскиот раст и на забавувањето на инфлацијата за целиот период на проекциите не е многу променета во однос на априлскиот циклус.
