.webp){kind=icon}
Владата нa денешната седница, на предлог на Министерството за финансии, го усвои предлог-буџетот за 2024 година. Вкупните приходи на буџетот се планирани на ниво од 310,1 милијарди денари (31,6 проценти од БДП) или околу пет милијарди евра и истите се за 10 проценти повисоки во однос на 2023 година. Расходите се планирани на ниво од 343,6 милијарди денари или околу 5,5 милијарди евра, што е 35 проценти од БДП и за 5,8 проценти повисоко во однос на 2023 година.
„Вака планираните приходи и расходи резултираат со буџетски дефицит на ниво од 3,4 проценти од планираниот БДП или во апсолутен износ од 33,5 милијарди денари (544 милиони евра). Планираниот дефицит е во согласност со определбата за фискална консолидација, пропратена со натамошна буџетска дисциплина и обезбеден фискален простор за поддршка на домашната економија и граѓаните и реализацијата на инфраструктурните проекти“, соопшти Владата.
Оттаму информираат дека цели на буџетот за следната година се да обезбеди забрзување на економскиот раст, да осигура фискална одржливост и да овозможи редовна исплата на сите обврски, вклучително и повисоки плати, пензии, социјални права, поддршка на претпријатијата и земјоделците , како и граѓаните.
Прочитај повеќе
Владата го усвојува буџетот за 2024 година – што треба да содржи?
„Блумберг Адрија“ ги праша економистите, работодавците и синдикатите што треба да содржи буџетот за следната година.
14.11.2023
УЈП наплатила 2,3 милијарди денари од компаниите за солидарен данок
Најголем износ, од 257,3 милиони денари, е уплатен од една скопска компанија со дејност леење челик.
09.11.2023
Бесими: Се крои буџет за поголем економски раст во 2024
Иако годината е изборна основните постулати ќе бидат обезбедување одржливи финансии и одржлив раст.
02.11.2023
Бишев, Беџети и Трпеска ќе немаат „сребрен куршум“ за државните финансии
Собранието ги избра тројцата експерти членови на Фискалниот совет и тие почнуваат со работа.
29.09.2023
„Буџетот за 2024 година ќе биде столб на економското заздравување, а понатаму и на забрзување на растот. Тој ќе обезбеди фискална одржливост преку понатамошно спроведување на процесот на фискална консолидација. Буџетот ќе биде добра основа за зголемена и забрзана реализација на инфраструктурните проекти, привлекување на странски инвестиции, иновативност на домашните компании, поддршка на домашната економија, приватниот сектор и граѓаните, како и интензивирање на конвергенција на Република Северна Македонија кон ЕУ,“ соопшти премиерот Димитар Ковачевски.
Тој додаде дека буџетот ќе овозможи редовно и непречено извршување на сите законски обврски, вклучително и обврските кои произлегуваат од членството во НАТО и непречено спроведување на изборните активности.
Според Ковачевски, буџетот трета година по ред се планира во услови на изразена неизвесност, надворешни ризици и неповолни трендови во глобалната економија и е одговор на потребите и состојбата во која се наоѓа македонската економија. Во 2024 година се очекува раст на економијата од 3,4 проценти во услови на зголемување на инвестициите, раст на потрошувачката на солидно ниво и закрепнување на надворешната побарувачка, додека стапката на инфлација се очекува да се стабилизира и е проектирана на 3,6 проценти.
Министерот за финансии Фатмир Бесими подвлече дека вака структуриран буџетот, со едновремено намалување на расходната страна и подобрување на наплатата на давачките на приходната страна, ја одразува заложбата на Владата за фискална консолидација, односно намалување на дефицитот.
„Предлог-буџетот ги има сите карактеристики едновремено да го поддржи развојот, но и да обезбеди фискална одржливост, што е од големо значење за економија во развој како нашата. Развој и одржливост - тоа се двата клучни збора кои го опишуваат буџетот за 2024 година. Буџетот за 2024 година е развоен, поради продолжувањето на инвестициите во инфраструктурата, односно најголемиот инфраструктурен циклус во историјата на нашата држава. Буџетот е одржлив, бидејќи и покрај силната инфраструктурна компонента и надворешните предизвици, продолжуваме со фискалната консолидација, односно го намалуваме и понатаму буџетскиот дефицит на 3,4 проценти (скоро една третина во однос на оваа година кој изнесува 4,8 проценти)“, потенцира Бесими.
Тој додаде дека за реализација на планираниот инвестициски циклус во буџетот преку капитални расходи се планирани 45,1 милијарда денари (733 милиони евра) за инвестиции во веќе започнатите инфраструктурни проекти, како патна и железничка, енергетска и комунална инфраструктура, во здравството, образованието, социјалниот систем, земјоделството, културата, спортот, заштита на животната средина и правосудството.
На прес-конференцијата беше истакнато дека со предлог-буџетот за 2024 година се продолжува воспоставената пракса за почитување на златното правило во јавните финансии, односно дефицитот да е помал од капиталните расходи и се обезбедуваат и средства за системски воспоставените механизми за понатамошно зголемување на платите во јавниот сектор согласно Општиот колективен договор, зголемување на пензиите и повеќе средства за општините.
„Само за исплата на зголемените плати во овој предлог-буџет се обезбедени дополнителни 160 милиони евра, дополнителни 170 милиони евра за спроведување на системското решение за исплата на зголемените пензии, а истовремено имаме номинално понизок дефицит во однос на оваа година за 150 милиони евра, тоа се средства со кои се прави заштеда и значи помало задолжување“, рече министерот Бесими.
Според Владата, со предлог-буџетот за 2024 година за тековните расходи се планирани 298,6 милијарди денари (4,8 милијарди евра), со кои се обезбедува редовна исплата на плати на вработените во јавниот сектор и нивно усогласување со Општиот колективен договор, навремена и редовна исплата на пензии и нивно усогласување согласно системското решение, гарантиран минимален приход и останати социјални права, исплата на субвенции во земјоделството, поддршка на малите и средните претпријатија, поддршка и субвенционирање на иновативните активности, како и алоцирање на средства за таргетирана поддршка на ранливи категории на граѓани и стопанството.
