.webp){kind=icon}
Во декември вкупните депозити остварија месечно зголемување од 4 проценти, соопшти Народната банка. Годишниот раст изнесува 8,7 проценти, како резултат на зголемувањето на депозитите на двата сектора, со малку поизразен придонес на корпоративниот сектор.
Вкупните кредити во декември бележат месечен раст од 1,3 отсто, кој е резултат на зголеменото кредитирање на двата сектора, со поголем придонес на корпоративниот сектор.
„Анализирано на годишна основа, кредитите растат за 5,1 отсто, што произлегува од зголеменото кредитирање на двата сектора, поизразено кај секторот ’домаќинства’“, информираат од Народната банка.
Оттаму додаваат дека кредитите на корпоративниот сектор во декември бележат месечен раст од 2,2 отсто, како резултат на повисоките кредити одобрени во денари и во странска валута, со поголем придонес на денарските кредити. Годишниот раст од 3,3 отсто на кредитите во корпоративниот сектор во целост се должи на зголеменото кредитирање во денари.
Во декември месечната стапка на раст на депозитите на домаќинствата изнесува 3,5 отсто, што во најголем дел е резултат на зголемените депозитни пари, а во позитивна насока влијаат и долгорочните депозити во странска валута и во денари, додека краткорочните депозити во денари и во странска валута забележаа намалување. Анализирано на годишно ниво, депозитите на домаќинствата забележаа раст од 7,9 отсто на повисоките долгорочни депозити во странска валута и во денари, како и депозитните пари, во услови на пад на краткорочните депозити во странска валута и во денари.
„Кредитите на домаќинствата остварија мал раст од 0,5 отсто на месечно ниво, кој во целост е одраз на зголеменото кредитирање во странска валута. Годишниот раст на овие кредити изнесува 6,7 отсто и во поголем дел се должи на зголеменото кредитирање во странска валута, при раст и на кредитите во денари“, додаваат од Народната банка.
Гледано според намената на кредитите одобрени на физичките лица, потрошувачките и станбените кредити, како најзастапени категории, забележаа зголемување за 1,1 отсто и 1,4 отсто на месечна основа, соодветно, при годишен раст од 6,5 отсто и 10,5 отсто, соодветно.
Автомобилските кредити бележат месечен и годишен раст од 2,7 отсто и 11,4 отсто, соодветно. Тој месец кај кредитите одобрени на кредитни картички е забележано месечно и годишно намалување од 1,9 отсто и 4,7 отсто, соодветно. Во декември негативните салда на тековните сметки се намалија за 13,8 отсто на месечна основа, додека на годишна основа остварија мал раст од 0,6 отсто. Во декември кредитите одобрени врз други основи се пониски за 2,5 отсто и 19,3 отсто на месечна и на годишна основа.
