.webp){kind=icon}
Министерството за економија нема да ја продолжи мерката за гарантирани цени, која завршува на крајот на месецов, туку, како што најави ресорниот министер Крешник Бектеши, ќе го чека носењето на законот за забрана на нефер трговски практики со кој, според него, ќе се стави ред во нелојалната конкуренција во трговијата и ќе доведе до намалување на цените на прехранбените производи.
„Очекуваме ова законско решение, кое е целосно усогласено со европската регулатива и е со европско знаменце, да биде усвоено во најкраток можен рок. Со законот очекуваме да се намалат цените на прехранбените и земјоделските производи“, вели Бектеши за МИА.
МИА
Законот за забрана на нефер трговски практики во синџирот на снабдување на земјоделски и прехранбени производи, како што кажа, уште во декември 2023 година, по предлог на Министерството за економија беше усвоен од Владата и доставен до Собранието.
„Законското решение со кое се става ред во нелојалната конкуренција во трговијата и се воведуваат фер практики помеѓу трговците и доставувачите во синџирот со земјоделски и прехранбени производи се очекува неделава да влезе во второ читање во комисиите во Собранието“, посочи Бектеши.
Министерството за економија лани на 20 септември донесе одлука за изменување на одлуката за посебни услови за трговија на одделни стоки, определување највисоки цени на одделни производи во трговијата на мало, како и обврска трговците да набавуваат и продаваат определени видови и количество на одделни стоки на потрошувачите според определен редослед, која беше објавена во „Службен весник“ и важи до 29 февруари годинава.
