Преку сеопфатна дигитализација на земјата, зајакнување на конкурентноста на економијата и искористување на потенцијалот на дијаспората, во Македонија може да се подобри животниот стандард на луѓето. Токму подобрувањето на квалитетот на животот преку забрзување на економскиот раст е основната цел на реформскиот план „Визија за забрзан раст“ што го предлага организацијата „Македонија 2025“.
За планот да стане реалност најважно е намалување на корупцијата односно нулта толеранција за корупцијата, преку транспарентност, систем базиран на заслуги и лична одговорност; континуиран раст на БДП над пет отсто годишно, преку зголемени инвестиции во образованието, деловни и регулаторни реформи, поддршка на извозот и намалување на сивата економија; како и квалитетна и ефикасна јавна администрација и пристапување во Европската унија.
„Македонија се соочува со силни развојни предизвици, како на локално, така на регионално и на глобално ниво, чија сложеност и неизвесност, заедно со бавниот напредок во приближувањето кон животниот стандард на ЕУ, повикуваат на сеопфатна, интензивна и темелна акција во претстојниот период. Токму ваквите состојби нè мотивираа да се посветиме на креирање на конкретни мерки со кои сакаме да ги поттикнеме сите чинители во општеството, да преземат одлучни активности за нивна имплементација“, изјави Никица Мојсоска-Блажевски, извршна директорка на „Македонија 2025“.
Блумберг Адрија
Основачот на „Македонија 2025“, Мајк Зафировски вели дека организацијата е подготвена да одигра конструктивна улога во спроведувањето на активностите од платформата.
„Покрај финансиска поддршка, подготвени сме да ги засилиме нашите лобистички напори во САД, ЕУ и кај соседните држави, со цел да обезбедиме поволни исходи за Македонија. Ќе ја поддржиме дигитализацијата на земјата и ќе ангажираме искусни експерти во областите на креирање развојни и антикорупциски политики. Македонија 2025 ќе ја активира целокупната своја мрежа и ресурси за остварување на целите и принципите на кои се темелат развојната платформа и реформскиот план што ги предлагаме. Истовремено, подготвени сме да соработуваме со сите заинтересирани страни, вклучувајќи ги и политичките партии, во остварување на овие цели кои ќе ни овозможат заедно да изградиме посилна нација – сега и во годините што доаѓаат“, истакна Зафировски.
Првата област која е опфатена со сетот на мерки е дигитализацијата на земјата.
„Во областа на дигитализацијата предлагаме мерки кои треба да овозможат граѓаните и фирмите да ги добиваат сите услуги и документи од државните институции по електронски пат. Ова значи целосна дигитализација на државните служби на централно и локално ниво, како и креирање систем за поддршка за дигитализација на микро, малите и средните претпријатија“, вели заменик-претседателот на Одборот на директори на М2025, Васко Кроневски.
Блумберг Адрија
Втората област е јакнењето на конкурентноста преку поддршка на домашните компании кои можат да го зголемат извозот.
„Динамиката и обемот на економскиот раст на нашата земја директно зависи од тоа колку и што извезуваме. А, за да можеме да се надеваме на зголемување на извозот неопходно е веднаш да се зафатиме со намалување на непотребниот бирократски товар за извозниците и регулативата која не само што не им помага, туку и ја намалува нивната конкурентска позиција, рече членот на Одборот на директори на организацијата Живко Мукаетов.
Во правец на подобрување на конкурентноста, земјава има потреба од привлекување нови инвестиции, а за тоа е потребен нов модел, вели членот на Одборот на директори на организацијата Виктор Мизо.
„За да ја унапреди вкупната конкретност на домашната економија, земјата мора да привлече и нови инвестиции од странство, за што неопходно е да се воспостави нова стратегија, вклучувајќи и нов модел што ќе биде атрактивен за инвеститорите. За тоа треба да се изградат и ефикасни агенции кои навистина ќе им овозможат брзо да ги реализираат своите инвестициски проекти во нашата земја“, вели Мизо.
Третиот сет мерки од планот „Визија за забрзан раст“ се однесува на подобро искористување на потенцијалот на дијаспората.
„Македонија се соочува со силни емиграциски движења и намалување на бројот на населението, што предизвикува сè поголем недостиг на работна сила, појава која веќе е пречка за економскиот развој на земјата. Едно од решенијата за ваквиот сериозен предизвик е да се креираат можности со кои ќе се олесни повратот на иселениците во нивната татковина. За тоа ние како организација нудиме конкретни мерки и политики кои државата може веднаш да ги спроведе“, вели членот на Одборот на директори на „Македонија 2025“ Боријан Борозанов.
Мерките од третиот сет вклучуваат дозвола за престој на лица со македонско потекло до четврта генерација како и воведување таканаречена пензионерска виза за лица со македонско потекло.
.webp){kind=icon}
