.webp){kind=icon}
Во април 2024 година, просечната каматна стапка на вкупните кредити изнесува 5,51 проценти и на месечна основа е зголемена за 0,01 п.п., при годишен раст од 0,43 п.п, соопшти Народната банка. Оттаму информираат дека просечната каматна стапка на вкупните депозити изнесува 1,82 проценти и оствари месечно и годишно зголемување од 0,02 п.п. и 0,65 п.п., соодветно.
„Просечната каматна стапка на новоодобрените кредити, во април, забележа месечен раст од 0,49 п.п. и изнесува 5,47 проценти, додека на годишна основа е зголемена за 0,03 п.п. Кај просечната каматна стапка на новопримените депозити е забележан месечен и годишен раст од 0,08 п.п. и 0,31 п.п., соодветно и изнесува 2,54 проценти“, наведуваат од Народната банка.
Во април 2024 година, просечната каматна стапка на вкупните кредити на корпоративниот сектор изнесува 5,35 проценти и е непроменета на месечно ниво. Споредено на годишно ниво, каматната стапка на вкупните кредити на корпоративниот сектор е зголемена за 0,56 п.п.
„Каматната стапка на новоодобрените кредити на корпоративниот сектор, во април, изнесува 5,57 проценти и забележа месечен раст од 0,84 п.п. Притоа, нагорната промена е резултат на зголемените каматни стапки на сите компоненти, и тоа: каматните стапки на денарските кредити со валутна клаузула, каматните стапки на кредитите во странска валута (за 0,52 п.п.) и каматните стапки на денарските кредити без валутна клаузула (за 0,26 п.п.). На годишна основа, оваа каматна стапка е зголемена за 0,04 п.п.“, велат од Народната банка.
Во април, просечната каматна стапка на вкупните депозити на корпоративниот сектор изнесува 2,11 проценти и е намалена за 0,01 п.п. на месечно ниво. Од НБМ објаснуваат дека падот е резултат на намалените каматни стапки на депозитите во странска валута и денарските депозити без валутна клаузула (за 0,05 п.п. и 0,01 п.п., соодветно), во услови на раст на каматните стапки на денарските депозити со валутна клаузула (за 0,02 п.п.). На годишна основа, оваа каматна стапка бележи раст од 0,29 п.п.
Каматната стапка на новопримените депозити на корпоративниот сектор, овој месец, е повисока за 0,09 п.п. и изнесува 2,61 проценти. Анализирано по валута, месечната промена се должи на растот на каматните стапки на денарските депозити со и без валутна клаузула (за 1,41 п.п. и 0,08 п.п., соодветно), при пад на каматните стапки на депозитите во странска валута (за 0,62 п.п.). Во споредба со април претходната година, каматната стапка на новопримените депозити на корпоративниот сектор е зголемена за 0,99 п.п.
Каматната стапка на вкупните кредити на домаќинствата во април е непроменета на месечна основа и изнесува 5,65 проценти. Споредено на годишна основа, оваа каматна стапка бележи раст од 0,31 п.п.
„Овој месец, просечната каматна стапка на новоодобрените кредити на домаќинствата изнесува 5,33 проценти и на месечно ниво е намалена за 0,07 п.п. Притоа, падот произлегува од намалените каматни стапки на денарските кредити без валутна клаузула и кредитите во странска валута (за 0,20 п.п. и 0,10 п.п., соодветно), во услови кога каматните стапки на денарските кредити со валутна клаузула се непроменети. На годишна основа, каматната стапка на новоодобрените кредити оствари раст од 0,07 п.п.“, посочуваатод Народната банка.
Во април, кај каматната стапка на вкупните депозити на домаќинствата е забележан раст од 0,03 п.п. на месечно ниво и изнесува 1,79 проценти. Месечната промена се должи на повисоките каматни стапки на денарските депозити без валутна клаузула и депозитите во странска валута (за 0,03 п.п., соодветно), додека каматните стапки на денарските депозити со валутна клаузула се намалени (за 0,01 п.п.). Во споредба со истиот месец претходната година, оваа каматна стапка е зголемена за 0,68 п.п. Каматната стапка на новопримените депозити на домаќинствата овој месец, изнесува 2,52 проценти и е зголемена за 0,10 п.п. на месечна основа. Промената е резултат на растот на каматните стапки на денарските депозити без валутна клаузула и депозитите во странска валута (за 0,10 п.п. и 0,08 п.п., соодветно).
„Притоа, во април, кај банките и штедилниците не се евидентирани новопримени денарски депозити со валутна клаузула. На годишна основа, каматната стапка на новопримените депозити на домаќинствата е зголемена за 0,18 п.п.“, информираат од Народната банка.
