Летово од Македонија чартери до само три дестинации: Има ли пари за нови?

Летувањето во кое патот ќе биде авионски можеби и не е толку скапа варијанта, но засега во Македонија е ограничена понудата на чартер дестинации. Туристичките агенции речиси секоја година истражуваат и нови можности, но нив ги ограничуваат многу фактори. Ние истражувавме кои се сите опции иако за жал нема многу. Во пакетите од агенциите најчести се понудите со хотели кои нудат услуга во која се е вклучено (all inclusive), па и со вклучен чартер-лет до дестинацијата.

Ова лето чартер летови само до три земји

Впрочем, Анталија и Бодрум во Турција, Хургада во Египет и Тунис се чартер дестинациите за кои можат да се одлучат македонските граѓани ова лето. Туристичките агенции велат дека овие дестинации се најатрактивни за граѓаните со оглед на прифатливите цени кои ги нудат. Најголем дел од чартер летовите туристичките агенции ги земаат под закуп и притоа се избираат дестинации кои патниците најчесто ги одбираат.

„Генерално има чартер летови, но факт е дека секогаш има потреба од нови дестинации за да бидеме поврзани. Дестинациите кои може да понудат цени прифатливи за нашиот стандард се клучен фактор во планирањето на нови чартер дестинации. На овие патувања може да се најде сместување и за 500 евра а во него да биде вклучено се, што за нашите граѓани е прифатлива понуда. Од тоа зависат новите дестинации, бидејќи кога еден чартер-лет ќе се земе, агенциите преземаат обврска капацитетот секоја недела да биде пополнет“, вели за „Блумберг Адрија“ Ана Марија Алексова-Малева од туристичката агенција „Стаф“.

Приватна архива/Ана Марија Алексова-Малева

Државното субвенционирање можност за нови чартер дестинации

Субвенциите од државата играат значајна улога во поддршката на постојните авиолинии. Грчката нискобуџетна авиокомпанија „Ејџијан ерлајнс“ веќе договори субвенции со Владата на Македонија за линиите Скопје-Атина и Скопје-Сараево. Иако капацитетите на авионите речиси никогаш не се исполнети, рутите се одржуваат благодарение на субвенциите. За нови дестинации треба вклученост и од државата која ќе овозможи поврзување на нови дестинации.

„По пандемијата се појави можноста агенциите да закупуваат места во авионите во текот на летната сезона, за нови агенциите не можат да се изборат бидејќи ќе ја ризикуваат сезоната. Потребна е вклученост од државата. Сепак да не заборавиме Македонија е мал пазар, дестинациите кој моментално се покриени со чартер летови ги задоволуваат потребите на граѓаните. Пример е Тунис како дестинација која веќе втора година е атрактивна, но оваа сезона се забележува намалување на интересот кај граѓаните и покрај тоа што е покриена со чартер“ вели за „Блумберг Адрија“ Харис Меѓедовиќ од туристичката агенција „Фибула Травел“.

Depositphotos

Во иднина да се работи за чартер летови во Италија и Шпанија

Туристичките агенции го истражуваат пазарот за нови чартер летови, она што недостига е координација и заедничко планирање. Можеби би било разумно да се разгледаат дестинации кои се релативно блиски и економски прифатливи за македонските туристи, како што се некои делови од Италија или Шпанија. Овие дестинации, иако можеби со повисоки почетни трошоци, би можеле да привлечат значителен интерес ако се понудат со атрактивни аранжмани и соодветни маркетинг кампањи.

„Кога би имале здружение во кое ќе бидат сите туристички агенции па заеднички да се усогласиме на пример годинава Италија ќе биде нова дестинација со чартер-лет и сите да мораме да ја работиме таа дестинација тогаш сликата би била различна од сега. Пред пандемијата имаше чартер-лет до Барселона, и имаше интерес, би можела таа дестинација повторно да се врати“ вели Меѓедовиќ.

Економската одржливост пречка за нови чартер летови

Една од главните пречки за воведување нови чартер линии е економската одржливост. За да се оправда еден чартер-лет, потребно е да има интерес од околу 120 патници на неделно ниво, што претставува голем предизвик за туристичките агенции во Македонија. Во изминатиот период неколку авиокомпании решија да ја ги намалат летовите од Скопје или целосно да ги укинат чартер летовите. Минатиот месец грчката авиокомпанија „Ејџијан ерлајнс“ ја прекина продажбата на билети за планираната нова авиолинија меѓу Скопје и Крф, која требаше да започне на почетокот на месецов и ги намали планираните летови од Скопје до Атина.

Од ноември нискобуџетната компанија „Изиџет“ планира да ги прекине операциите меѓу Женева и Скопје од почетокот на зимската сезона 2024/25, со што ќе заврши тригодишната континуирана услуга кон македонскиот главен град.

И нискобуџетната авиокомпанија „Виз ер“ за претстојната зимска сезона ја намали френфекцијата на девет линии од скопскиот аеродром, а причината за намалувањето на летовите поради приземјени авиони кои подлежат на инспекции поради производствени проблеми со моторите.

Во моментов нема коментари за веста. Биди прв да коментира...

Остави коментар