Извозот кон Германија годинава паднал за над 12 отсто

Извозот од земјава во осум месеци од оваа година паднал за 5,7 отсто споредено со истиот период лани. Вкупната извезена стока била со вредност од 5 190.2 милиони евра.

Во истиот период била увезена стока во вредност од 7 341.3 милиони евра, што е за 0.6 отсто повеќе во споредба со истиот период од претходната година.

Според податоците на државниот завод за статистика, трговскиот дефицит, во периодот јануари – август 2024 година изнесува 2 151.2 милиони евра.

Од пет земји со кои земјава вообичаено има најголема трговска размена, пад има во четири. Извозот кон Германија, најголемиот македонски трговски партнер, во овој период бележи пад од над 12 отсто. Од првата петорка, извозот е во плус само со Србија.

Покриеноста на увозот со извоз, во периодот јануари – август 2024 година, изнесува 70.7 отсто.

Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, делови на седишта, катализатори на носачи.

Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и други моторни возила за превоз на лица.

Во моментов нема коментари за веста. Биди прв да коментира...

Остави коментар