Скопските плати над просекот, а останатите региони?

Во Македонија има големи разлики во висината на просечната плата во зависност од герографската местоположба. Новите податоци на Државниот завод за статистика покажуваат дека од вкупно осум региони, единствено просечната плата во Скопскиот Регион го надминува државниот просек додека платите во сите останати региони се под просекот.

Имено, во текот на 2023 година просечната плата во Македонија била 36.624 денари, а во Скопскиот Регион изнесувала 41.410 денари, што е 13,1 проценти над државниот просек. Најнизок просек на исплатена нето-плата по вработен од 29.744 денари за 2023 година е забележан во Вардарскиот Регион, што е за 18,8 проценти помалку во однос на вкупниот просек во Македонија.

Инаку, според податоците на ДЗС, просечната исплатена нето-плата по вработен во 2023 година, во однос на 2022 година се зголемила за 114,9 проценти, а ваквото зголемување се должи, пред сѐ, на зголемувањето на просечната исплатена нето-плата по вработен во Пелагонискиот Регион (16,6 проценти), Источниот Регион (15,7 проценти) и во Полошкиот Регион (15,3 проценти).