text size
Просечната нето-плата во земјава за еден месец се намалила за речиси 1.000 денари. Според податоците што Државниот завод за статистика (ДЗС) ги објави денеска, просечната исплатена нето-плата во јули изнесува 40.961 денар, што е за 2,3 проценти, односно за 978 денари помалку од претходниот месец, кога изнесувала 41.939 денари.
Ваквиот месечен пад на износот на просечната нето-плата, според експертите, се должи на користењето годишни одмори, што во пракса значи дека работниците добиваат помалку бонуси, кои инаку влегуваат во крајната пресметка на платата.
„Станува збор за месец кога претежно се користат годишни одмори. Тоа значи дека работниците работат помалку и со тоа не успеваат да ги достигнат бонусите што вообичаено ги прават со работата во другите месеци од годината“, објаснува Гадаф Реџепи, професор на Универзитетот на Југоисточна Европа.
Гадаф Реџепи, професор на Универзитетот на Југоисточна Европа
НБРМ
Тој посочува дека и во претходните години во летните месеци се јавувала таква разлика, само што досега не била толку многу изразена.
„Сега веќе претежно сите компании покрај основната плата нудат и бонуси за сработеното, па тоа се одразува и на пресметките. И сметам дека таквиот тренд ќе продолжи и во следните години“, вели професорот Реџепи.
Инаку, споредено на годишно ниво, платата во јули годинава е за 12,9 проценти повисока, или во апсолутна вредност е зголемена за нешто над 4.600 денари.
Вообичаено, највисоки плати земаат вработените во секторот информации и комуникации (75.612 денари), како и во финансиските и дејностите на осигурување (61.152 денари).
Статистика пресмета најниски плати во угостителството, каде што работниците во јули во просек зеле 29.919 денари, а во секторот земјоделство, шумарство и водостопанство просечната плата е 31.289 денари.
.webp){kind=icon}
