Минималецот значително ја покачи и просечната плата во земјава. Според Државниот завод за статистика (ДЗС), просечната исплатена месечна нето-плата во Македонија во март била 34.925 денари. Споредено со претходниот месец, зголемувањето на просечната плата е 3,6 проценти, а на годишно ниво растот на платите е 12,4 проценти.
Поттик за таквиот раст даде покачувањето на законски пропишаната минимална плата во земјава, која во согласност со законското решение се коригира во март според растот на трошоците на живот и на просечната плата во текот на изминатата година. Па, така, во март годинава минималецот порасна од 18.000 на 20.175 денари.
Вицепремиерот за економски прашања Фатмир Битиќи на својот фејсбук-профил напиша дека политиките на оваа влада придонесуваат за зголемување на стандардот на граѓаните во земјава.
„Оваа влада со носењето предвидливи и конзистентни економски политики и понатаму ќе овозможи константно зголемување на стандардот на своите граѓани, чии плати се очекува да продолжат да растат 10-20 проценти во наредните неколку месеци. Дополнително креираме нови високо платени работни места, носејќи инвеститори што воведуваат нови технологии и чии производи и услуги имаат висока додадена вредност, што неодминливо ја зголемува продуктивноста на целокупната домашна економија, а тоа е основниот двигател на растот на платите, кои сè повеќе и повеќе ќе растат“, напиша вицепремиерот Битиќи, истакнувајќи дека растот на просечната плата од 12,4 проценти веќе се доближува до инфлаторната стапка, која за март, според ДЗС, изнесуваше 14,7 отсто.
Но токму инфлацијата ја расипува оваа убава слика за растот на платите. Имено, Статистика пресмета дека реалната просечна нето-плата во земјава на годишно ниво се намалила за два отсто, секако, како последица на растот на цените.
Вицепремиерот очекува дека инфлацијата во наредниот период ќе продолжи да паѓа, како што впрочем проектираат Народната банка и меѓународните институции, вклучувајќи ги Светската банка и Меѓународниот монетарен фонд.
На годишно ниво, процентуално најмногу пораснале платите во градежништвото, за 19,8 проценти, како и во образованието, за 15 отсто. Највисоки плати, стандардно, земаат вработените во секторот информации и комуникации, каде што просекот е 67.973 денари, а во чии рамки најплатени се тие што работат компјутерско програмирање, со просечен месечен надомест од 90.848 денари. Меѓу другите повисоко платени професии се тие од финансиските дејности, со просечна плата од 50.876 денари, и вработените во рударство и вадење камен, со просечна нето-плата од 49.582 денари.
Најмали се платите во секторот угостителство, каде што просекот е 25.798 денари, но како поединечни гранки најмалку се платени вработените во кожарската индустрија, со просечна исплатена плата од 23.154 денари, и тие што работат во заштитни и истражни дејности, чија плата е под законскиот минимум и изнесува 19.927 денари.
.webp){kind=icon}
