Нема крај на растот на цените - индустриските производи во ноември поскапеле за 5,6 отсто

Цените на индустриските производи на домашниот пазар во ноември годинава се за 5,6 проценти повисоки од истиот месец лани, а во однос на октомври се зголемени за 0,7 отсто, покажуваат податоците од Државниот завод за статистика.

 

 

Гледано на годишно ниво по индустриски групи, најголемо зголемување на цените има кај енергијата, од дури 13,1 отсто, а производите за широка потрошувачка во ноември годинава се за 8,1 отсто поскапи од истиот месец лани. Интермедијарните производи бележат значително поевтинување на годишно ниво, од дури 24 отсто, а капиталните производи се поевтини за 4,9 проценти.

 

 

Ако подетално ги разгледаме статистичките податоци во преработувачката индустрија, најголемо зголемување на цените има кај производството на тутунски производи, од 11,3 проценти, преработката на дрво и производи од дрво, за 10,5 отсто, и производството на пијалаци, кадешто зголемувањето на цените на годишно ниво е 8,7 отсто.

 

 

Меѓу позначајните сектори во преработувачката индустрија што треба да се споменат се производството на електрична опрема, чии продажни цени во ноември годинава се за 7,8 отсто повисоки од истиот месец лани. Тука некаде е промената и на индексот кај производството на фармацевтски производи и препарати, каде што цените за една година се покачиле за 7,4 отсто, додека прехранбените производи се поскапи за 4,7 проценти.

Малобројни се секторите каде што ценовната корекција е во надолна линија. Меѓу повидливите се промените кај производството на метали, чии цени во ноември годинава се за 7,2 проценти пониски од истиот месец лани, а во секторот за производство на фабрикувани метални производи цените се за 5,7 проценти пониски од пред една година.

 

Во моментов нема коментари за веста. Биди прв да коментира...

Остави коментар