Ем сметките растат ем масите полни: Кој троши во македонските меани?

Кафеанските сметки непрестајно растат. Податоците од Државниот завод за статистика (ДЗС) покажуваат дека во ноември годинава индексот на цени на угостителски услуги се зголемил за шест отсто споредено со истиот месец лани.

Ако се гледа по одделни ставки, позначително е поскапувањето на пијалаците во однос на храната. Поточно, цените на безалкохолните пијалаци на годишно ниво се зголемиле за 5,4 отсто, на алкохолните пијалаци за 5,1 отсто, додека храната поскапела за 1,9 проценти.

 

 

Кога станува збор за храната во угостителските објекти, цената на лебот е таа што најмногу се покачила, дури за 5,2 проценти. Салатите се поскапи за четири отсто, варивата за 4,5 проценти, предјадењата за 2,8, додека слатките за 2,2 отсто. Готовите јадења и печените меса на годишно ниво бележат минимално поскапување од 0,6, односно 0,3 проценти.

За разлика од ресторанскиот дел, услугите за ноќевање се енормно зголемени. Просечната цена за ноќевање во ноември годинава е дури за 21,3 отсто поголема од истиот месец лани.

И покрај растот на цените, прометот во угостителството расте

Во услови на ваков раст на цените, се поставува прашањето за колку ќе се зголеми прометот во угостителството и дали, и покрај вивнатите цени, хотелските соби ќе продолжат да се полнат, а место во рестораните ќе треба однапред да се резервира.

Се чини дека и инфлацијата, која во земјава континуирано ги крева цените во угостителскиот сектор, не е причина за воздржување од задоволствата да се патува или да се седне во кафеана.

Претходните статистички податоци покажуваат дека бројот на ноќевања континуирано расте и во периодот од јануари до септември годинава се остварени 2,8 милиони ноќевања, или за 165.126 ноќевања повеќе од истиот период лани.

„Блумберг Адрија“ пишуваше и за тоа дека прометот во угостителството расте од година на година. Па, во 2023 година за храна и пиење во угостителските објекти во земјава се слеале 182,7 милиони евра, што е за над 10 милиони евра повеќе во споредба со 2022 година.

 

 

Гледано по региони, најмногу промет имало во скопските угостителски објекти. Во 2023 година во нив завршил близу половина од вкупниот промет на државно ниво. Следен регион по висина на прометот е Охридскиот.

Кој троши во кафеани?

Според Аркан Керим, претседател на Туристичко-угостителската комора при Сојузот на стопански комори (ССК), зголемениот промет во угостителството се должи на странските туристи, кои особено годинава ги има во огромен број.

Аркан Керим, претседател на Туристичко-угостителската комора при Сојузот на стопански комори Фото: ССК

Керим вели дека официјалната статистика не ја дава реалната слика со туристите од причина што, според него, никаде не се регистрираат како туристички кратките влезови на странците, особено од Косово и од Грција, кои во голем дел доаѓаат во казината во земјава и притоа трошат пари и во рестораните.

„Инаку, споредено со другите балкански земји, Македонија има најниски угостителски цени. Прогласени сме и за најевтина дестинација во Европа во тој дел“, вели претседателот на Туристичко-угостителската комора.

Скапата струја допрва ќе ги вивне цените во угостителството

Во разговор за „Блумберг Адрија“, Аркан Керим од ССК вели дека цените во угостителството во голема мера зависат од цената на електричната енергија.

„Ако се зголемат цените на електричната енергија, како што веќе видовме дека се случи минатата недела, драстично ќе се зголемат и цените во угостителството. Имаше и најава дека ќе се зголемат цените за стопанството кај нас, а тоа секако дека ќе се одрази врз угостителството бидејќи не само што ќе се зголемат цените на производите туку ќе стане поскапо и самото одржување на објектите. А, тоа ќе се одрази на крајната цена за потрошувачот, односно гостинот“, вели Керим.

 

Во моментов нема коментари за веста. Биди прв да коментира...

Остави коментар