Ноќевањата за една година поскапеле за 21 отсто, лебот за 5,2 отсто

Цените на угостителските услуги во октомври се покачиле за 6,1 отсто во споредба со истиот месец лани, покажуваат податоците на Државниот завод за статистика (ДЗС). Споредено, пак, со месецот претходно, во октомври угостителските услуги биле за 1,1 отсто повисоки.

Најмногу поскапеле ноќевањата, и тоа на годишно ниво дури за 21,3 проценти, односно на месечно ниво за 5,9 отсто.

 

 

Според пресметките на ДЗС, пораст на цените на годишна основа има буквално кај сите ставки што влегуваат во категоријата угостителски услуги. Притоа, позначајно зголемување на цените има кај пијалаците. Во октомври годинава во однос на истиот месец лани безалкохолните пијалаци се продаваат по цени повисоки во просек за 5,2 отсто, додека за алкохолните пијалаци се плаќало 4,9 проценти повеќе.

Храната минатиот месец била поскапа за 2,1 отсто на годишна основа, а интересен е податокот дека најголемо покачување на цените има кај лебот, дури за 5,2 проценти. Сепак, споредено со септември лебот е поевтин за 0,1 отсто.

Важно е да се потсети дека цените на храната во овој период беа опфатени со владината мерка, со која бруто-профитната маржа беше ограничена на 10 отсто за 73 основни прехранбени производи, кои според владината одлука беа дел од есенската кошничка. Таквиот начин на интервенции на пазарот имаше цел да ги намали трошоците на граѓаните за храна. Мерката стапи во сила кон крајот на септември, а траеше до 31 октомври.

Оваа мерка во наредниот период ќе се применува како божиќна кошница, рамазанска кошница, велигденска кошница со ограничено време на траење пред и за време на празниците, кога вообичаено се зголемуваат цените на основните прехранбени производи, со цел да се заштити стандардот на граѓаните.

 

Во моментов нема коментари за веста. Биди прв да коментира...

Остави коментар