Глобалните цени на храната забележаа најголем раст од март 2022 година

Глобалните цени на храната се зголемија за три отсто во септември во споредба со август, што е најголем месечен пораст од март 2022 година. Цените на сите видови стоки пораснаа во опсег од 0,4 до 10,4 отсто.

Индексот на цените на храната на ФАО беше 124,4 поени во септември 2024 година, што е за 2,1 отсто повисоко отколку во август минатата година, но сепак е 22,4 отсто под својот врв од 160,3 поени постигнат во март 2022 година.

Житарките поскапеа за три отсто на месечно ниво, но сепак се поевтини за 10,2 отсто во однос на септември лани. Резервите од регионот на Црното Море спречија скок на цените на пченицата, но неповолните услови во Бразил и САД придонесоа за раст на цената на пченката. Цената на оризот падна за 0,7 отсто поради намалената трговска активност.

Цената на растителните масла достигна највисоко ниво од почетокот на 2023 година. Континуираниот раст на индексот на цените е поттикнат од повисоките цени на маслата од палма, соја, сончоглед и семе од репка.

Млечните производи поскапеа за 3,8 отсто во споредба со август и се за 21,7 отсто поскапи во однос на септември 2023 година. Светските цени на путерот пораснаа 11-ти месец по ред, поддржани од солидниот увоз и домашната побарувачка, како и ниските резерви на млеко во Западна Европа.

Најмал раст на цената од 0,4 отсто е забележан кај месото. Сепак, месото и понатаму е поскапо за 4,8 отсто во однос на лани. Растот на индексот го предводи поскапувањето на живинското месо. Во меѓувреме, меѓународните цени на говедското месо останаа стабилни, бидејќи ограничените резерви од водечките земји-производители беа доволни за да се задоволи глобалната побарувачка за увоз.

Од друга страна, најсилен раст е забележан кај шеќерот, чија цена во однос на август е зголемена за 10,4 отсто, но сепак е за 22,7 отсто пониска од септември 2023 година. Зголемувањето во септември е поттикнато од загриженоста за намалената глобална достапност во претстојната сезона. Влошувањето на изгледите за земјоделски култури во Бразил, поради продолженото суво време и пожарите што ги оштетија полињата со шеќерна трска кон крајот на август, беа главните двигатели на зголемувањето на глобалните цени на шеќерот.

Ова поскапување беше очекувано. Сушите, поплавите и шумските пожари од Азија до Америка ја зголемуваат загриженоста за приносите на културите, ги зголемуваат цените на основната храна, што на крајот може да доведе до повисоки цени на намирниците, објави „Блумберг“.

Индексот на цените на земјоделството на „Блумберг“ – кој вклучува девет главни артикли – забележа месечен раст од повеќе од седум проценти, најмногу по руската инвазија на Украина на почетокот на 2022 година. Иако е далеку од врвот во таа година, порастот доаѓа бидејќи фармите од Бразил до Виетнам и Австралија се борат со поплави и прекумерно суво време, што ги загрозува шеќерот, житарките и кафето.