Драстични разлики во цените на храната во македонските градови

Македонските граѓани во изминатиов период беа изложени на рекордна инфлација, која предизвика значителен пораст на цените на основните прехранбени производи. Во услови на енормни поскапувања, анализиравме дали и колку местото на живеење игра улога во инфлаторниот удар односно дали и колкави разлики има во висината на цените на храната во поголемите градови во Македонија. Наодите се изненадувачки, со оглед на тоа што од град до град има енормни разлики во цените на исти производи.

Тетовци јадат најскап грав

Најновите податоци на Државниот завод за статистика за цените на мало откриваат дека граѓаните на Тетово јадат најскап грав во Македонија иако станува збор за град што е познат токму по тетовското гравче. Во јули годинава килограм грав во Тетово чинел 282 денара, што е убедливо највисока малопродажна цена во споредба со цените во сите други поголеми градови во Македонија.

Забележителни разлики во цените има и кај млекото и млечните производи. Литар трајно млеко најскапо се продавало во Струмица (82,8 денара), а најевтино во Велес (71,7 денар). Овчото сирење имало највисока цена во Битола (570,5 денари за килограм), а најниска во Велес (488,8 денари за килограм). Од друга страна, охриѓани јаделе најскап кашкавал (658,6 денари за килограм), а путерот имал „најсолена“ цена во Штип (865,4 денари за килограм).

Лебот од пченично брашно во јули годинава бил најевтин во Охрид (60,3 денари за килограм), а најскап во Скопје (95,7 денари за килограм). Големи разлики во цените има и кај оризот, тестенините и пченичното брашно.

  

Телешкото како злато во Скопје

Килограм телешко месо во јули годинава во Скопје достигнало цена од 817,6 денари, што е речиси двојно повеќе отколку во Охрид, каде што цената изнесувала 449,3 денари. Статистиката открива дека цените на сите видови месо и риба се највисоки во Скопје, со исклучок на пилешкото, кое имало највисока цена во Охрид (272 денара за килограм).

Значителни разлики во цените на мало од град до град може да се забележат и кај многу други основни намирници, како што се солта, шеќерот, оцетот, кафето, чоколадото, мармаладот итн.

 

 

Најевтино вино во Струмица, најскапо во Охрид

Слична е состојбата и кај пијалаците. Најниска цена на литар вино со процент на алкохол од 11 малигани е забележана во Струмица (117,4 денари), а највисока во Битола (174,2 денари). Од друга страна, најевтино пиво се продавало во Струмица, а најскапо во Тетово. Разлики во цените може да се видат и кај минералната вода.

Дури и јајцата имаат различна цена на мало во зависност од градот во кој се продаваат. Едно јајце во јули годинава имало највисока цена во Струмица (10,6 денари), а најниска во Куманово (8,6 денари).

Всушност, статистиката открива дека од град до град речиси ниту еден прехранбен производ нема иста цена. Надвор од прехранбените производи, македонските граѓани плаќаат исти цени без оглед на местото на живеење само за горивата и за електричната енергија.

 

 

Во моментов нема коментари за веста. Биди прв да коментира...

Остави коментар