Владата на Србија ги намалува цените на 700 производи

Во Србија денеска почнува владината акција „Најдобра цена“ во чии рамки ќе се намалат цените на 700 производи до крајот на октомври во околу 2.500 малопродажни продавници во земјата. Акцијата вклучува 81 вид основни производи, а намалувањето во просек ќе биде 26,82 проценти, рече премиерот Милош Вучевиќ на презентацијата на акцијата и истакна дека домаќинствата ќе можат да заштедат од 8.000 до 22.000 динари месечно со купување на производи кои ќе бидат вклучени во акцијата.

Станува збор за производи кои ја сочинуваат потрошувачката кошничка односно средства за лична хигиена, прашок за перење, пелени за бебиња, храна за бебиња, сокови, хемикалии за домаќинство, различни видови храна, јајца, сладолед, овошје, зеленчук, месо и млечни производи, јогурт и млеко.

Поевтинувањата ќе се движат од седум проценти, колку ќе се намали цената на киселото млеко, до 58 проценти, колку што ќе поевтини прашокот за перење. Цената на килограм пилешко ќе се намали за 15,22 проценти, на свинско за 11,57 проценти, на јајцата за 13,41 проценти, а на компирите за 27,65 проценти. Кога станува збор за средствата за хигиена, детскиот шампон ќе поевтини за 34,87 проценти, пелените за бебиња за 28,64 проценти, а пакувањето од две четкички за заби за 33,17 проценти. Со акцијата вклучена е и сувата храна за домашни миленици, која ќе поевтини за 30 проценти.

Во моментов нема коментари за веста. Биди прв да коментира...

Остави коментар