Во јули сѐ поскапело – инфлацијата се искачи на 4,8 отсто

Индексот на трошоците на животот во јули 2025 година, во однос на јули 2024 година, бележи зголемување од 4.8 отсто, а индексот на цените на мало бележи зголемување од 5.3 отсто, соопшти Државниот завод за статистика. 

На годишно ниво, највисок раст има кај цените на храната од 6,8 отсто.

На месечно ниво, инфлацијата мерена преку индексот на трошоците на животот изнесува 1.1 отсто.

„Повисоката инфлација во јули 2025 година, во однос на јуни 2025 година, е резултат на зголемувањето на трошоците на животот во следните групи: транспорт за 9.9 отсто, рекреација и култура за 2.1 отсто, ресторани и хотели за 1.2 отсто, мебел, покуќнина и одржување на домаќинствата за 0.7 отсто, здравје, храна и безалкохолни пијалаци за 0.3 отсто и облека и обувки, домување, вода, електрика, гас и други горива за 0.1 отсто“, соопшти ДЗС.

Во јули пониски цени за 0.1 отсто се измерени само кај алкохолот, тутунот, наркотиците и кај ставката разновидни стоки и услуги и алкохолни пијалаци, тутун и наркотици.

Трошоците на животот во групите комуникации и образование остануваат на исто ниво како и во претходниот месец.

За разлика од земјава, инфлацијата во еврозоната во јули се задржа на целните два отсто.

Во моментов нема коментари за веста. Биди прв да коментира...

Остави коментар