Што нудат македонските хотели со пет ѕвездички?

Елитен туризам е тема за која сè погласно се зборува во регионот Адрија. Со експанзијата на социјалните мрежи и тенденцијата гостите да се фотографираат во што поотмен амбиент, драстично пораснаа и апетитите за сместувачките капацитети.

Луксузно сместување се нуди и во Македонија. Имаме 20 хотели со пет ѕвездички, но според последниот регистар на Министерството за економија, само пет од нив се категоризирани со ознаката супериор (superior), односно нудат соби поголеми од стандардните. Ниту еден не е на охридското крајбрежје.

Приватна архива/ „Парк“

„Парк“, Холидеј ин“, како и „Мериот“ и Хилтон“, кои се дел од светски познати синџири, се меѓу највисокорангираните хотели во Скопје. Со пет ѕвездички во македонската метропола се и хотелите „Лимак“, „Њу стар“, „Александар палас“, „ТЦЦ гранд плаза“, „Арка“ и „Буши“.

Надвор од Скопје, единствена компанија што може да се пофали со ознаката супериор од највисок ранг е „Принцес груп“, која стопанисува со хотелот „Рамада“ на граничниот премин со Грција. Гевгелија е и вториот македонски град со најмногу сместувачки капацитети за елитни гости во земјава, по Скопје. Таму уште три хотели имаат пет ѕвездички - „Аполонија“, „Скај“ и „Фламинго“. Сите имаат и лиценци за приредување игри на среќа.

Приватна архива/ „Арка“

Во Охрид, кој со години се промовира како најголем и најпосетуван туристички центар, само два хотела имаат највисока оценка, а тоа се „Инекс Олгица“ и „Јуник“. Само уште еден хотел покрај Охридско Езеро може да се пофали со пет ѕвездички, а тоа е „Изгрев“ во струшкото село Калишта.

Од вкупно рангираните 225 угостителски објекти, хотели со пет ѕвездички има и во Берово („Аурора ресорт и спа“), Велес („Гардениа“) и во Тетово („Меркур“). Ниту еден ваков хотел нема во најпознатите скијачки центри кај нас.

Приватна архива/ „„Аурора ресорт и спа““

Цените достигнуваат и до 420 евра од ноќ 

Понудата во македонските хотели со пет ѕвездички е стандардна - од бесплатен паркинг до фитнес и спа-активности. Само некои имаат базен, но и комплетен пристап за лица со инвалидитет. Во повеќето хотели нема да ве примат со домашни миленици. Во рестораните најчесто се служи медитеранска храна.

Цените за сместување варираат во зависност од комфорот и од опременоста што гостите ќе ја одберат. Најскапите хотелски соби во Македонија во просек чинат 150 евра за едно ноќевање.

Според компанијата за резервации на хотели и куќи за изнајмување „Букинг“ (Booking.com), двајца за едно ноќевање во „Дабл три“ (DoubleTree By Hilton) во Скопје ќе треба да платат околу 100 евра за соба со брачен кревет без појадок. Ако, пак, се одлучат за апартман со ознака супериор, услугата ќе ги чини двојно повеќе.

Слични цени на пазарот имаат и другите хотели со пет ѕвездички. Најскапи се апартманите со повеќе од една спална соба, во кои можат да се сместат и до шест гости. Еден таков во охридскиот „Јуник ресорт и спа“ чини околу 420 евра од ноќ за овој период од годината. Налето, во екот на сезона, веројатно ќе платите многу повеќе.

Приватна архива/„Јуник ресорт и спа“

Ѕвездички имаме, но нудиме ли луксуз? 

Хотелите со пет ѕвездички во Македонија се разликуваат од оние во Западна Европа. Дали хотелот ќе добие највисока оценка зависи исклучиво од стандардите што ги поставило самото министерство во земјата во која се наоѓа. Затоа неинформираните гости често се разочаруваат од квалитетот на услугата.

Хотелите со пет ѕвездички мора да нудат врвна услуга и да ги исполнат очекувањата и на најпребирливите гости. Треба задолжително да имаат вработено вратар задолжен за паркирање на автомобилите, нешто што ретко во кој македонски хотел се практикува.

Во овие хотели персоналот мора да ви ги однесе куферите до собата во која сте сместени. Лобито мора да биде пространо, со просторија за седење и бар. Секој гостин во собата треба да затекне свежо цвеќе или некој друг подарок за добредојде. Креветите мора да имаат врвни душеци и многу перници. Во мини-барот треба да доминираат премиум брендови. Гостинот мора да има на располагање сервис за пеглање и облеката да му биде вратена во рок од еден час. Во хотелите со пет ѕвездички кујната не смее да се базира на индустриски преработена храна.

Приватна архива/„Изгрев“

Во последните децении на глобалниот пазар се промовираат и хотели со повеќе од пет ѕвездички, но станува збор за маркетиншки трик. И познатиот „Бурж ал Араб“ (Burj Al Arab) во Дубаи има​ пет сертифицирани ѕвездички, иако туристите одамна му „доделија“ седум. Единствениот сертифициран хотел со седум ѕвездички е „Севен старс галерија“ (Seven Stars Galleria) во Милано.

Во моментов нема коментари за веста. Биди прв да коментира...

Остави коментар