Индустриските производи во декември поскапеле за 5,3 отсто

Продажните цени на индустриските производи на домашниот пазар во декември биле за 5,3 отсто повисоки од пред една година, покажуваат најновите податоци од Државниот завод за статистика.

 

 

„Во декември 2024 година продажните цени на производителите на индустриски производи на домашниот пазар се пониски за 0,1 отсто на месечно ниво, а повисоки за 5,3 отсто на годишно ниво“, пишува во соопштението од Државниот завод за статистика.

Најголем раст на цените се забележува кај секторот енергија, кои на годишно ниво се зголемиле за 12,9 проценти. Следуваат производите за широка потрошувачка, чии цени пораснале за 7,7 отсто. Поевтинување е регистрирано кај цените на капиталните производи, од 4,9 отсто, како и кај интермедијарните производи што не ја опфаќаат енергијата, а нивното намалување е дури 24,3 отсто.

 

 

Ако подлабински ги анализираме податоците по сектори и оддели, ќе издвоиме дека цените во преработувачката индустрија во декември се зголемиле за 3,9 отсто. Притоа, најголем е ценовниот раст кај производството на тутунски производи (+11,3 проценти), печатење и репродукција на снимени записи (+9,0 отсто) и производството на пијалаци (+8,8 отсто). Од друга страна, најголем пад на цените има кај преработката на дрво и производи од дрво, не вклучувајќи мебел (-6,3 проценти), како и во секторите за производство на метали и на фабрикувани метални производи (-5,7 отсто).

Снабдувањето со електрична енергија и гас бележи раст на цените од дури 14 проценти, а снабдувањето со вода и управувањето со отпад и отпадни води на годишно ниво е поскапо за 4,5 проценти.

 

Во моментов нема коментари за веста. Биди прв да коментира...

Остави коментар