Расте бројот на туристи и ноќевања во споредба со лани. Според бројките од Државниот завод за статистика, во месец јуни годинава имало 77,1 отсто повеќе туристи од истиот месец лани, додека бројот на ноќевања се зголемил за 60,7 проценти.
Конкретно, Статистика во месец јуни изброи 83.532 туристи кои реализирале вкупно 189.111 ноќевања. Странските туристи надминуваат две третини од вкупната бројка, или 56.540, додека 26.992 биле домашни гости.
Кај бројот на домашни туристи порастот е 21,3 проценти споредено во периодот јуни 2022 со јуни 2021 година, додека кај странските туристи растот е дури 126,9 проценти. Тука мора да се земе предвид дека лани беа активни дел од превентивните мерки за заштита од Ковид-19, за разлика од годинава.
Ако се земе предвид првата половина, односно периодот од јануари до јуни, годинава во Македонија се регистрирани 317.539 туристи, кои реализирале 692.493 ноќевања.
Сепак, тоа се бројки помали од пред пандемијата. Ако првите шест месеци од годинава се споредат со истиот период од 2019 година, ќе се заклучи дека бројот на туристи е помал за 133.323, додека во шесте месеци годинава се оствариле дури 251.114 ноќевања помалку отколку во предпандемиската 2019 година.
Инаку, во јуни 2022 најбројни биле туристите од Србија (14,9 проценти) и Турција (13,5 проценти), а следуваат гостите од Германија (6,1 отсто), Полска (5,3 отсто), САД (4,5 отсто) и Грција (4,3 отсто).
.webp){kind=icon}
Во моментов нема коментари за веста. Биди прв да коментира...