СКМ: Ако државата не помогне, компаниите ќе го намалат производството

Енергетската криза да стане приоритет за државата, бара Стопанската комора на Македонија. Предупредуваат дека ако државата не им помогне на компаниите, тие нема да имаат друга алетрнатива освен да го намалат производството и бројот на вработени. „Иневестициските активности се мисловна именка“, велат во соопштението пред владината седница на која ќе с еразгледува состојбата во енергетиката во земјава.

„И досега за одредени прашања сме имале различни ставови, некогаш сме наоѓале заеднички јазик, некогаш не, но ова прашање добива такви димензии, ако не изградиме заеднички став може да доведе до состојба од која враќањето на нормалното функционирање на компаниите ќе биде невозможно“, велат од најголемата Комора.

Заклучоците што Комората ги подготви и ги прати до Владата се од минатиот месец, а од тогаш состојбата на енергетскиот пазар стана подраматична што го покажуваат сметките за струја кои компаниите ги добиваат деновиве, како и овонеделниот раст на цените на берзите.

Цената на струјата на најголемата европска берза во Лајпциг, како и на Унгарската берза од каде домашните компании набавуваат струја неделава надмина 500 евра, а и без тоа македонскиот бизнис плаќа најскапи енергенси во регионот.

Комората бара зголемување на домашното производство на струја преку искористување на сите ресурси:

- Набавката на јаглен и мазут за ТЕЦ Неготино да има апсолутен приоритет веднаш.  За да може да се обезбедат нови количини на мазут потребно е да се пушти продажбата на слободен пазар, односно да се тргне од листата на регулирана цена, за да не се случи недостиг на пазарот.
- ТЕ-ТО да биде во функција цела година, бидејќи многу важно да се има домашно производство не само во услови за да има стабилност туку и за услови доколку се случи затворање на границите и на cross border протокот (преку граничниот проток на електрична енергија). Во спротивно ќе се случат рестрикции што негативно ќе се одрази на континуирано производство на домашната економија.
- 40 до 45 мегавати фотоволтаици што се инсталирани и/или се инсталираат, сеуште чекаат на приклучок на мрежа. Се бара ЕВН и сите субјекти кој што се одговорни да ги приклучат во најбрз можен рок, бидејќи нема економска оправданост да има инсталирани фотоволтаици а истите да не се ставени во функција само затоа што не се приклучени на мрежата.
- Владата да ја врати Уредбата која беше во функција во услови на прогласена кризна состојба со која целокупната произведена енергија од обновливи избори беше насочена само за индустријата. Тоа беше и единствена мерка за поддршка на индустријата во делот на набавка на енергенси со поповолни услови. Со укинување на таа Уредба енергијата произведена од обновливи извори наменета за индустријата се намали за цели 8 процентни поени и сега изнесува од 6% до 7%, што значи со губењето на енергија од обновливите извори за потребите на индустрија производните трошоци на компаниите ќе растат.
- Се бара измени во Законот за градба, со цел легализирање на индустриски капацитети/објекти само со Г намена (за незагадувачка индустрија), кои се изградени согласно веќе донесените урбанистички планови и имаат основни проекти, но немаат дозвола за градба од повеќе објективни причини.
- Регулаторна комисија за енергетика да припреми Правилник за организирање дистрибутивни мрежи.
- Со зголемување на инсталираната моќност од фотоволтаиците ќе настане потреба од градење на 110 киловолтни трафостаници а на тие ќе има можност да се приклучат и други производители.
- Да се спречат злоупотребите на стопанските субјекти кои се префрлаат на универзален снабдувач а при тоа ги исполнуваат условите да бидат на слободен пазар. Тоа е работа на Регулаторна комисија за  енергетика, која при вака констатирани злоупотреби треба да му даде налог на ЕВН истите да се прекинат, бидејќи со таквата злоупотреба се прават две штети. Прво се ставаат економските субјекти во нерамноправна положба и второ непотребно се оптоварува ЕСМ. 

 

 

Во моментов нема коментари за веста. Биди прв да коментира...

Остави коментар