.webp){kind=icon}
Народниот правобранител, во врска со ситуацијата во која се најдоа жителите на Арачиново, кои веќе трет ден немаат електрична енергија, упати апел до ЕВН Македонија и до надлежните институции, пред сѐ до МВР, веднаш да ги преземат сите мерки и да обезбедат предуслови за санирање на дефектот.
Како што соопштија од ЕВН Македонија, ваквата состојба е последица на дефект поради преоптоварување на трафостаниците.
Народниот правобранител информира дека до неговата канцеларија е доставена претставка од група граѓани, жители на општина Арачиново, кои наведуваат дека иако редовно си ги плаќаат сметките за потрошена електрична енергија, во ситуацијава, во услови на економска криза, трпат големи материјални штети (им се расипува храната складирана во фрижидерите), но и дека не се во состојба да одржуваат лична хигиена, а се жалат и дека во овој случај со одолжување на санирањето на дефектот се дискриминирани.
„Народниот правобанител во оваа прилика ги повикува на заедничка соработка и локалните власти, како и жителите на општината, со цел што побрзо нормализирање на состојбата“, стои во соопштението.
