.webp){kind=icon}
Откако вчера беше исклучена струјата во неколку подружници, дознаваме дека денеска од утрово со истиот проблем се соочувала и главната дирекција на АД Водостопанство. Според нашите информации, во последен момент пред исклучувањето, се обезбедиле пари за да се плати долгот. Долговите за струја се само една голема ставка од сите долгови на ова државно претпријатие за чии проблеми веќе пишувавме. Над 600 вработени таму веќе трет месец се без плата. Дзнаваме дека и во ваква тешка ситуација се реализираат нови вработувања. Се ангажирале и шест советници од кои двајца дури биле пензионери па се склучувале договори на дело. Кога пишувавме за проблемите на АД Водостопанство минатата недела, се обративме во Владата под чија надлежност е ова претпријатие и каде таа е единствен акционер со барање да ни се одговори што ќе преземе за решавање на ситуацијата и краткорочно, ама и на долг рок. На повеќето прашања следуваше овој одговор.
„Владата е запознаена со финансиската состојба на АД Водостопанство на Северна Македонија и ќе помогне да се надминат предизвиците со кои тоа се соочува, изјавија од Владата.
Ветија дека во најскоро време ќе се одржи состанок на ресорните министри со раководството на акционерското друштво во државна сопственост на кој требаше да се утврди висината на финансиската помош за одржување на ликвидноста и нормалното функционирање на основната дејност на Друштвото. Исто така трабше ќе биде разгледан и соодветен план за реструктурирање на АД Водостопанство.
Сепак најверојатно нема никаква разврска, дополнително поради неплатени долгови се исклучува струјата во подружниците. Вчера вработените од водостопанската подружница „Брегалница“ во Кочани каде од утрото напојувањето беше прекинато тврдеа дека дошле на работните места, но биле оневозможени да ги извршуваат работните задачи и да им издаваат решенија, фактури и друга документација на водокорисниците и странките. Од раководството на „Брегалница“ соопштија, пак, дека немаат сознанија за колкав период не е платена струјата, со оглед што трошоците ги подмирува централата на АД Водостопанство во Скопје.
„Како подружница редовно ги исполнуваме обврските за одржување на каналската мрежа, за водоснабдување на корисниците и за наплата на водниот надоместок, поради што сме една од најдобрите работни единици на Водостопанство. Само годинава наплатата на сметките за користење на нашите услуги е реализирана со над 90 отсто и парите се уплатени на заедничката сметка на претпријатието, така што нејасно е зошто не се платени трошоците за струја, па дојдовме во ситуација да нè исклучат од мрежата. Од колеги од другите градови дознавме дека и таму ситуацијата е иста, односно од 12 подружници во државата, денеска половината останале без електрична енергија, истакна Благојчо Богатинов, в.д. раководител на водостопанската подружница „Брегалница“.
Како што пишувавме, Владата му даваше на друштвото финансиска помош од државниот буџет и претходно, а имаше и некои најави за реструктуирање. Но од обидите ништо не беше долгорочно решение на проблемот.
Во декември 2020 година кога носеше дополнителен пакет за помош на стопанството за справување со последиците од Ковид-19, Владата обезбеди финансиска поддршка од околу 36 милиони денари (600.000 евра) за исплата на две плати на вработените во АД Водостопанство.
Следната година во август, помош повторно беше потребна па така Владата подготви пакет помош од 200 милиони кои требаше да се префрлат до крајот на годината. Претходно пак уште во 2019 претпријатието добило бескаматна позајмица од 1,5 милиони евра од Министерството за финансии. Дали е вратен долгот, нема информации.
Последните податоци за долговите кои се ставени на интернет страницата се заклучно со јуни лани кога обврските на ова државно претпијатие изнесуваат 303 милиони денари од кои 51 милион денари се недоспеани обврски, а остатокот од 252 милиони денари се доспеани. Тогаш најголем бил долгот кон ЕВН, за други обврски но и за ДДВ и за плати.
Актуелен директор е Локман Љимани.
