Од денеска „Епл пеј“ е достапен во Македонија, но уште не за сите македонски платежни картички. НЛБ е првата банка што стана дел од мрежата на „Епл пеј“, овозможувајќи со тоа активација на македонските платежни картички „виза“ и „мастеркард“ издадени од оваа банка во електронскиот паричник на „Епл“. Тоа нуди брзо и лесно плаќање преку сите уреди на „Епл“. „Виза“ веќе потврди за ова.
Истовремено, од денеска НЛБ ја нуди оваа опција и за корисниците во Босна и Херцеговина, за што уште вчера пишуваше тамошната редакција на „Блумберг Адрија“.
Извршниот директор на НЛБ, Блаж Бродњак, пред неколку недели преку својот профил на Линкдин најави дека „Епл пеј“ ќе биде достапен во регионот до крајот на јули.
LinkedIn
Според најавите, освен НЛБ, се очекува уште неколку други банки да ја овозможат услугата „Епл пеј“ за македонските платежни картички до септември.
Ние веќе пишувавме дека по 11 години од лансирањето на „Епл пеј“ (Apple Pay), услугата конечно ќе биде достапна и за корисниците на македонски платежни картички. Како пионер во развојот на дигитални паричници, компанијата „Епл“ ја понуди услугата „Епл пеј“ во 2014 година, а брзиот технолошки развој придонесе таа да стане широкоприфатен начин на плаќање. Процените покажуваат дека лани преку „Епл пеј“ плаќале околу 744 милиони корисници. За посликовито да се увиди експанзијата на оваа услуга, ќе споменеме дека пред пет години услугата ја користеле 507 милиони потрошувачи, а се очекува до 2030 година бројот на корисници да надмине една милијарда.
Преку „Епл пеј“ се вршат милијарди трансакции годишно, а услугата е достапна во повеќе од 90 држави низ светот, поддржана од над 11.000 банки.
Текстот се надополнува со нови информации.
.webp){kind=icon}
Во моментов нема коментари за веста. Биди прв да коментира...