Македонските платежни картички конечно ќе станат дел од услугата „Епл пеј“

По 11 години од лансирањето на „Епл пеј“ (Apple Pay), услугата конечно ќе биде достапна и за корисниците на македонски платежни картички. Како пионер во развојот на дигитални паричници, компанијата „Епл“ ја понуди услугата „Епл пеј“ во 2014 година, а брзиот технолошки развој придонесе таа да стане широкоприфатен начин на плаќање. Процените покажуваат дека лани преку „Епл пеј“ плаќале околу 744 милиони корисници. За посликовито да се увиди експанзијата на оваа услуга, ќе споменеме дека пред пет години услугата ја користеле 507 милиони потрошувачи, а се очекува до 2030 година бројот на корисници да надмине една милијарда.

Преку „Епл пеј“ се вршат милијарди трансакции годишно, а услугата е достапна во повеќе од 90 држави низ светот, поддржана од над 11.000 банки. Разбирливо, „Епл пеј“ доминира на американскиот пазар со 54 проценти удел во трансакциите реализирани преку мобилни паричници.

Овие податоци доволно говорат колку Македонија заостанува во овој процес. Но, да гледаме позитивно и да се надеваме дека конечно земјава ќе се вмрежи во големата заедница на „Епл пеј“.

Важно е да се знае дека услугата „Епл пеј“ не е ограничена со локација каде што може да се користи и плаќа со неа, туку со издавачите на платежните картички. Тоа значи дека во Македонија и досега се плаќаше на овој начин, но тоа беше привилегија единствено за корисници на платежни картички (кредитни или дебитни) издадени од странски банки што се дел од мрежата.

„Досега услугата ‘Епл пеј’ беше достапна само за корисници на картички издадени од странски банки. Во моментов се создаваат предуслови за проширување на оваа можност и на картичките издадени од домашни банки, што претставува значителен исчекор за домашниот пазар“, велат од Народната банка во одговор за „Блумберг Адрија“, посочувајќи дека тоа е резултат на повеќе фактори: новата регулаторна рамка, која овозможува влез на глобални технолошки решенија под транспарентни и регулирани услови, технолошката подготвеност на банкарскиот сектор, растечкиот интерес кај граѓаните и банките за модерни, дигитални начини на плаќање, како и поширок пазарен тренд на намалување на провизиите за дигитални плаќања, кој овозможува поповолни услови за користење вакви услуги.

„Во практика, ова значи дека корисниците ќе можат да вршат бесконтактни и онлајн плаќања преку своите епл-уреди (ајфон, епл воч и други компатибилни уреди), поврзани со сметки кај домашни банки – без потреба од физичка картичка. Овој развој е дел од пошироката дигитална трансформација на пазарот на платежни услуги во земјата“, велат од Народната банка.

Преговорите за имплементација на „Епл пеј“ се одвиваат во тајност

Процесот за имплементација на оваа услуга подразбира директна комуникација и техничка координација меѓу банките и „Епл“, велат од Народната банка, додавајќи дека динамиката на активностите зависи од подготвеноста на вклучените страни.

„Народната банка внимателно го следи развојот на процесот, имајќи го предвид неговото значење за понатамошната дигитализација на платежниот пазар“, посочуваат оттаму.

Самите преговори и процедурите за имплементација се одвиваат во доста доверливи околности меѓу конкретната банка и компанијата „Епл“, ама и со вклученост на меѓународните институции што се исто така издавачи на платежни картички, како што се на пример „Мастеркард“, „Виза“, „Американ експрес“ и други.

Според тоа, во оваа фаза на подготовка е непознато за јавноста колку и кои конкретно банки од земјава ќе ја овозможат услугата, чиј почеток се најавува за септември. Во секој случај, услугата ќе биде достапна откако институциите ќе ја потврдат својата техничка подготвеност.

 

Depositphotos

„Очекувањата се дека услугата ‘Епл пеј’ наскоро ќе стане достапна и за корисниците на платежни услуги во нашата земја. Почетокот на нејзиното функционирање зависи од динамиката на техничката интеграција и договорните односи меѓу ‘Епл’ и домашните банки. Се работи за процес што вклучува низа чекори и индивидуални аранжмани, но се забележува позитивен тренд што води кон негова реализација во блиска иднина“, посочуваат од Народната банка.

Достапноста на оваа услуга претставува важен чекор во дигиталната трансформација на платежниот пазар во нашата земја, велат од НБРМ. „Тоа е потврда за зрелоста на домашната инфраструктура и за отвореноста на системот за нови технолошки решенија засновани на цврста правна рамка во платежната сфера усогласена со правото на Европската Унија. Ова ќе придонесе за побрзи, побезбедни и поудобни плаќања за граѓаните, како и за поголема конкуренција и иновации на пазарот“, велат од Народната банка, напоменувајќи дека НБРМ ќе продолжи да го поддржува пристапот на вакви решенија, во услови на транспарентност и висока заштита на потрошувачите.

Од Асоцијацијата за е-трговија на Македонија сметаат дека најавата за влез на „Епл пеј“ е одлична вест и претставува значаен чекор што ќе придонесе за модернизација на платниот систем во земјава, како и за поголема дигитализација.

Depositphotos

„Влезот на ‘Епл пеј’ ќе значи побрзо, полесно и поедноставно плаќање пред сѐ преку мобилни уреди, меѓутоа и преку други уреди, како паметни часовници, што директно ќе влијае да се зголеми користењето на дигиталните плаќања. Секако дека се очекува раст на онлајн трансакциите и дигиталните плаќања без присуство на картичка, поголема доверба на корисниците, особено кај помладите и оние што се технолошки поподготвени, како и еден поттик за бизнисите што побрзо да се дигитализираат и да ги понудат овие современи начини на плаќање“, изјави во понеделникот Филип Чижбановски, заменик-претседател на Асоцијацијата за е-трговија на Македонија, во рамките на гостувањето во емисијата „Спотлајт“ на телевизијата „Блумберг Адрија“.

Според него, покрај раздвижување на платниот систем, вмрежувањето на земјава во системот „Епл пеј“ ќе донесе уште една опција за брзо и лесно плаќање, подобрена безбедност и поголема приватност бидејќи „Епл“ не ги зачувува трансакциите, како што и не зачувува никакви податоци од картичката. Корист ќе имаат и бизнисите бидејќи клиентите побрзо ќе го финализираат купувањето, ќе има помал број  напуштени кошнички поради тоа што нема да има потреба од рачно внесување на сите податоци од платежна картичка бидејќи таа веќе ќе биде дел од паричникот на „Епл“, а тоа ќе резултира со подобрено корисничко искуство за крајниот клиент.

„Како ќе влијае сето ова на е-трговијата? Дефинитивно ќе се зголеми мобилната продажба, ќе се подобри искуството бидејќи ќе имаме брзо и лесно одјавување и брза и лесна нарачка, а тоа ќе донесе зголемување на бројот на онлајн трансакции“, вели Чижбановски.

Како функционира „Епл пеј“?

Самиот термин „Епл пеј“ се однесува на бесконтактен систем за плаќање и услуга за дигитален паричник што ја нуди компанијата „Епл“. Услугата им овозможува на корисниците да плаќаат за производи и услуги користејќи комуникација односно близинска конекција (NFC) на местото на продажба, без разлика дали лично преку iOS-апликации или од далечина преку интернет.

„Епл пеј“ се смета за алтернатива на кредитните и дебитните картички, вклучувајќи картички со чип и ПИН, како и традиционални картички со магнетна лента. 

Depositphotos

„Епл пеј“ бара од корисниците да ги прикачат своите информации за плаќање во дигиталниот паричник на „Епл“ (Apple Wallet) и да ги следат чекорите преку верификација со издавачот на картичката. Откако ќе се прикачат, сите информации потребни за плаќање остануваат поврзани со апликацијата, така што корисникот не треба физички да има картичката со себе за да може да плати на продажното место. Услугата „Епл пеј“ ја поддржуваат сите уреди почнувајќи од ајфон 6 (iPhone 6) и сите понови модели, како и „епл воч“ (Apple Watch), ајпед (iPad) и мекбук (MacBook).

Важно е да се знае дека „Епл пеј“ функционира со кој било систем за бесконтактно плаќање, а не само со терминали специфични за „Епл“.

Покрај леснотијата на користење, една од главните позитивни страни на „Епл пеј“ е зголеменото ниво на безбедност што го нуди. „Епл пеј“ во суштина создава токен во својата инфраструктура што ги заменува информациите за кредитната картичка. Наместо нив, системот креира нешто што е познато како број на сметка на уред, кој е шифриран и складиран во безбедносниот елемент на уредот. По плаќањето, тоа е токенот што трговците го користат за обработка на трансакцијата, што значи дека тие никогаш немаат директен пристап до деталите за картичката.

Софтверот за препознавање на врвовите на прстите вклучен во идентификацијата со отпечаток од прст (Touch ID) на „Епл“ е уште една функција за верификација што гарантира дека купувањата ги врши само овластен корисник. Другата можност - идентификацијата на лице (Face ID) - се очекува да стане сеприсутна безбедносна функција низ производите на „Епл“, а компанијата ветува дека никогаш нема да споделува информации за картичката преку својот облак. Иако тоа значи дека корисниците мора рачно да ги внесуваат информациите за картичката во секој уред, сепак тоа ја зголемува безбедноста на услугата.

Во моментов нема коментари за веста. Биди прв да коментира...

Остави коментар