Фатен последниот воз за „Гугл пеј“, за пари од странство нема решение

„Гугл пеј“ (Google Pay) неодамна конечно стана сервис достапен и во Македонија, иако засега е со ограничен опсег. Имено, од компанијата „Виза“ (Visa) веќе објавија дека со нивната картичка оваа можност е достапна и за корисниците од Македонија.

„Гугл пеј“ односно апликацијата „Гугл волет“ (Google Wallet) овозможува брзо и едноставно плаќање со картичките што веќе ги имаме преку паметен телефон или паметен часовник, независно дали станува збор за плаќање во продавница или за онлајн тргување.

За да ја активирате услугата „Гугл пеј“ со картичката „виза“ е потребно:

* да го отворите „Гугл плеј стор“ (Google Play Store) на вашиот телефон
* да ја најдете и преземете апликацијата „Гугл волет“ (Google Wallet)
* да ја поставите вашата картичка „виза“ (Visa) како прв избор за плаќање во апликацијата „Гугл волет“, информираат од компанијата „Виза“.

Притоа, неопходно е телефонот да има инсталиран оперативен систем Андроид (Android (Lollipop 5.0 или понова верзија).

Bloomberg Mercury

 

Засега за корисниците на „Виза“, „Гугл пеј“ е достапен единствено за картичките издадени од НЛБ банка, а веќе и Комерцијална банка најави дека овој сервис наскоро ќе биде достапен и за нејзините корисници, но не само на картичките „виза“ туку и на „мастеркард“ (Mastercard), со што се овозможува бесконтактно плаќање преку паметен телефон или часовник.

Како се користи „Гугл пеј“?

„Гугл пеј“ односно „Гугл волет“ (дигиталниот паричник) функционира на тој начин што откако ќе ја симнете апликацијата на својот паметен мобилен телефон или часовник, ќе внесете онолку картички колку што сакате да имате на располагање и потоа можете да плаќате на сите продажни места каде што има ПОС-терминал за бесконтактно плаќање (contactless payment), преку интернет-страници каде што има опција за плаќање преку „Гугл пеј“, но и да подигнувате готовина од банкомати што имаат бесконтактен читач.

Плаќањето преку интернет е стандардна процедура, но самата постапка за плаќање на ПОС-терминал или, пак, за подигнување готовина од банкоматите што ја дозволуваат таа опција се врши на начин што кога преку телефонот или часовникот ќе го отворите дигиталниот паричник, прво ќе ја одберете саканата картичка со која имате намера да ја извршите трансакцијата и ќе го доближите телефонот или часовникот до читачот на ПОС-терминалот или банкоматот и плаќањето или подигнувањето готовина ќе се реализира.

Bloomberg Mercury

 

Постапката е доста едноставна и ветува значително зголемување на е-трговијата и, генерално, бесконтактното плаќање. Тоа, според познавачите на пазарот со кои разговаравме, е еден од клучните моменти што ќе помогнат да се забрза дигитализацијата, во која, генерално, земјава заостанува во многу сегменти.

Во однос на законската регулатива, нема пречки за либерализација на услугите од електронските платежни сервиси бидејќи Народната банка пред неколку години ја укина регулативата и овозможи алтернативи за македонските граѓани. Но одлуката за дејствување во земјава зависи од самите компании што оперираат во финансискиот сектор.

Либерализацијата на пазарот на електронски сервиси за финансиски трансакции не само што ги олеснува работата и функционирањето и на фриленсерите и на фирмите туку придонесува за целата економија. Дополнително, ја поттикнува електронската трговија и го олеснува пристапот до странските пазари и за купувачите и за продавачите.

„Достапноста на дигитални платформи за плаќање како 'Гугл пеј' во земји како нашата, а и во другите земји од регионот, помага да се поттикне растот на дигиталната економија, да се промовира општество без готовина и ја намалува зависноста од физичка валута, овозможувајќи позитивни искуства за брзи и ефикасни безготовински трансакции“, вели Виктор Стојкоски, генерален секретар на Асоцијацијата за е-трговија на Македонија.

Со користењето на апликацијата „Гугл волет“, според Стојкоски, корисниците што поседуваат паметни уреди со соодветните оперативни системи практично ќе може да го заменат својот физички паричник со дигитален паричник на својот паметен уред, каде што покрај тоа што ќе може да ги зачуваат своите платежни картички што сакаат да ги користат за безготовинско плаќање и вадење пари од банкомат, ќе може да зачувуваат и други потребни работи, како на пример: картички за лојалност, билети за кино и за авион итн.
„Со тоа се елиминира потребата од носење готовина или физички картички, што ги прави трансакциите поудобни и поефикасни“, вели Стојкоски, додавајќи дека „Гугл пеј“ нуди голем број предности за е-трговијата, вклучувајќи поедноставени процеси на наплата со само еден клик, подобрени искуства за плаќање преку мобилни телефони, глобална застапеност, беспрекорна интеграција, како и имплементација на силни безбедносни карактеристики што придонесуваат за градење доверба помеѓу бизнисите за е-трговија и нивните клиенти.

Виктор Стојкоски, генерален секретар на Асоцијацијата за е-трговија на Македонија
Фото: Приватна архива

 

„Со искористување на ваквите придобивки, е-трговијата кај сè повеќе и повеќе луѓе ќе станува приоритетен избор како полесен и поефикасен канал при пазарење, а бизнисите со е-трговија ќе можат да привлечат повеќе клиенти, да ги подобрат стапките на конверзија и да го подобрат целокупното искуство при онлајн купување за нивните корисници“, вели нашиот соговорник од Асоцијацијата за е-трговија.

„Искрено верувам дека интеграцијата на 'Гугл пеј' ќе биде поттик и за други вакви платформи, како 'Епл пеј' (Apple Pay), што поскоро да ги дозволат и направат достапни за користење услугите во Македонија и во земјите од регионот“, заклучува Стојкоски.

Со „Гугл пеј“ до раст на е-трговијата, но проблемите со трансфери на пари од странство остануваат

Горјан Јовановски, креатор и коосновач на апликацијата „Мој воздух“, која постои веќе деветта година и функционира во повеќе од 40 држави, вели дека убавината на тоа што сега имаме пристап до „Гугл пеј“ е дека секој со андроид-телефон или паметен часовник ќе може бесконтактно да плаќа со своите картички од банка, но тоа не е никакво олеснување за тие што работат со странство.

„Убаво е затоа што може на брз начин да плаќаме и може да имаме повеќе картички во тој електронски паричник на ‘Гугл’, без притоа да се грижиме дали сме ја понеле со себе соодветната картичка или сме ја заборавиле дома“, вели Јовановски, дообјаснувајќи дека „Гугл волет“ претставува само дигитален паричник каде што може да ги зачуваме сите наши картички, независно дали се на име на физичко лице или на фирма, за кои сме потписници и може да ги користиме, па тоа значително го олеснува секојдневното функционирање.

„Но не е замена за ‘Пејпал’ (Paypal) или за ‘Пејонир’ (Payoneer), кои издаваат сопствени картички преку кои може да се префрлаат пари и да се извршуваат соодветни трансакции. Значи, проблемот со трансфер и користење пари од странство не е уште решен. Ова е само една убава алатка и тоа е сѐ“, вели Јовановски.

Bloomberg Mercury

 

Тоа го потврдува и Данко Димоски, дизајнер за видеоигри, кој веќе десетина години е во гејминг-индустријата и главно е ангажиран за странски компании.

Тој вели дека опцијата на „Гугл пеј“ е добра за сите потрошувачи кај нас, но тоа не им олеснува на тие што работат за странски компании и добиваат плата или надомест за проекти од странство. Тој конкретно добива плата од странска компанија преку авторска агенција и тоа за него претставува соодветно решение за реалниот проблем за легален трансфер на пари од странство за тие што се ангажирани одовде.

Македонија речиси последна „се фати за орото“

Земјава е меѓу последните од регионот што го воспоставуваат системот на „Гугл пеј“, заедно со Албанија, Црна Гора и Босна и Херцеговина (кој инаку одамна е достапен во Бугарија, Грција, Романија, Хрватска, Словенија, а од лани и во Србија), а проблемот задира многу подлабоко.

„Блумберг Адрија“ веќе пишуваше за тоа колку Македонија доцни со алтернативните платежни системи и какви последици и негативно влијание има кај фриленсерите или тие што редовно работат оттука за странски компании. На пример, сервисите како „Пејпал“ и „Пејонир“ се достапни во земјава, но само за плаќање, а не и за подигнување готовина, па фриленсерите се принудени да одат во други земји од соседството за да ги подигнат заработените пари од банкомат, бидејќи за да го сторат тоа во Македонија, кај дел од сервисите воопшто не е можна таа опција, а за дел провизиите се огромни. Дополнителен проблем претставува и тоа што постојат и други ограничувања, на пример од каде може да добиете пари доколку користите некоја од овие сервисни платежни картички.

Во моментов нема коментари за веста. Биди прв да коментира...

Остави коментар