Трендот на раст на купувањето онлајн што го наметнаа мерките за спречување на ширењето на пандемијата од Ковид-19 продолжува и годинава, а најдобар показател за тоа е што во првите три месеци е остварен годишен раст од 8,7 проценти во трансакциите на виртуелните (интернет) продажни места. Податоците на Народната банка, покажуваат дека во изминативе неколку години има зголемување на бројот и на вредноста на трансакциите извршени со домашни платежни картички во интернет продавниците во земјава и во странство.
Во март годинава вредноста на вкупниот број трансакции со домашни платежни картички во интернет-продавниците во земјава изнесувала околу 2,2 милијарди денари или 35,9 милиони евра, што е рекорд на месечно ниво во изминативе шест години.
Рекорди се уриваат и во интернет-шопингот во странство. Имено, во текот на минатата година со платежни картички издадени во земјава биле купени производи и услуги во странски интернет продавници за 6,2 милијарди денари или нешто повеќе од 100 милиони евра.
Според статистиката на Народната банка, во 2021 година е забележан годишен раст на бројот на трговци во Македонија коишто прифаќаат плаќања со картички на виртуелните места на продажба за 11,2 проценти и нивниот број изнесувал 1.346. Тоа е сигнал дека и покрај континуираниот раст на е-трговијата во земјава, Македонија каска зад повеќето европски земји во однос на свесноста на компаниите односно на менаџерите за придобивките од модерните технологии и можностите за онлајн продажба на производи и услуги.
На тоа се укажува и во последната публикација на Асоцијацијата за е-трговија на Македонија во која се дава преглед за оваа дејност во 2021 година. Имено, во неа се вели дека од вкупниот број деловни субјекти во Македонија заклучно со 2020 година веб-страница имале само 54,5 проценти од компаниите, што е далеку од европскиот просек (над 77 проценти).
Поразително е што само 39 проценти од вкупниот број компании со над десет вработени имале каталог на производи и ценовници на веб-страниците, а едвај 12 проценти нуделе можност за резервации и нарачки. Уште еден податок кој покажува дека има простор за развој на е-трговијата во Македонија е што само 5,5 проценти од компаниите во земјава во 2020 година примиле нарачки преку веб-продажба.
.webp){kind=icon}
