Портфолиото на македонските резиденти во странство надмина 1,2 милијарди евра

Состојбата на средствата врз основа на портфолио-инвестиции (вложувања на македонски резиденти во странски хартии од вредност) на 30.06.2025 година изнесува 1,2 милијарди евра, од кои околу милијарда евра се вложувања во сопственички, додека 201,9 милиони евра во должнички хартии од вредност, покажуваат новите податоци на Народната банка.

Анализирано по земји, најголеми портфолио-инвестиции има во Соединетите Американски Држави во износ од 789,1 милион евра, Германија во износ од 106,7 милиони евра и Ирска во износ од 103,8 милиони евра.

Од аспект на оригиналната валута на вложување, најголем дел од портфолио-инвестициите се направени во САД долари и во евра (936,1 и 238,7 милиони евра, соодветно).

На крајот од првото полугодие од 2025 година, анализирано од аспект на секторот на домашниот инвеститор, осигурителните друштва и пензиските фондови имаат доминантно учество со состојба на портфолио-инвестиции во износ од 861,3 милиони евра, што претставува 71,6 проценти од вкупните портфолио-инвестиции.

Според секторот на нерезидентниот издавач, доминантно учество имаат вложувањата во хартии од вредност издадени од останатите финансиски институции  (освен осигурителни друштва и пензиски фондови и фондови на пазар на пари) во износ од 755,3 милиони евра.