Македонскиот е-купувач прави зделки до 50 евра и најчесто купува облека

Македонскиот е-купувач е сличен на балканскиот, добро е поврзан со интернет, но главно го користи за социјални медиуми, телефонирање, видеоповици... Најчесто прави нарачки до 50 евра и купува облека. Притоа, тоа не му е навика, туку го прави еднаш-двапати во три месеци, што значи дека е „случаен онлајн купувач“. Генерално, плаќа во готово при доставата и прави зделки со домашни продавачи. 

Како што рече денеска претседателката на Асоцијацијата за е-трговија, Нина Ангеловска Станков, некои од причините за ваквите карактеристики се немањето доволно дигитални вештини, ниското ниво на користење е-банкарство, немањето навики за плаќање со картичка, како и немањето доверба дали ќе стигне производот.

Врз е-трговијата, оцени Ангеловска Станков, многу влијае и доставата. Според последната анкета, која опфатила 40 компании од Западен Балкан, најголем предизвик се токму брзината на доставување, флексибилноста, доверливоста и недоволната професионалност на доставувачите, кои многу влијаат врз креирањето на искуството кај граѓаните од онлајн купувањето. 

Најновите податоци покажуваат дека во земјава над 86,6 отсто од домаќинствата имаат пристап до интернет, а 88,3 проценти од популацијата се активни интернет-корисници. 

Нина Ангеловска Станков Асоцијација за е-трговија

„Регионот споредено со Европа има најниско ниво на иматели на сметки, на платежни картички и најмалку користи платежни картички. Готовината е сè уште доминантен начин на плаќање. Денеска ќе видиме како да ги ’отплеткаме’ другите платежни методи што во развиените земји се норма и каде што плаќање во готово не се ни нуди како опција“, истакна Ангеловска Станков пред почетокот на регионална конференција за е-трговија. 

Земјите од Западен Балкан имаат напредок во е-трговијата, но и покрај растот, се рангирани најниско во споредба со европските држави.

„Имаме прогрес, но далеку сме од фаќање чекор со европските земји. Имаме уште многу работа. Во однос на подготвеноста за е-трговија, секогаш ја гледаме и дигиталната подготвеност како предуслов. Тука сè уште не сме на завидно ниво зашто во однос на дигиталните вештини, регионот е многу ниско рангиран и потребно е забрзување. Албанија во однос на е-трговијата минатите пет години бележи раст од 370 проценти, а Србија како најголем пазар има најголем потенцијал - има 65 отсто онлајн купувачи од интернет-корисниците, додека Македонија е на второто место, со 54 проценти“, рече Ангеловска Станков.

Македонскиот е-купувач, освен облека, купува и електроника, производи за домаќинство...

„Имаме разлики со европскиот купувач кога станува збор за електрониката. Албанија, на пример, купува повеќе од европскиот купувач, а Црногорците многу нарачуваат храна од ресторани за разлика од Европејците. Во однос на зделките, кои се најчесто до 50 евра, една од причините е куповната моќ. Сепак, некои од овие зделки се плаќаат во готово при доставата. Во Европа нарачките просечно се од 100 до 500 евра. Битно е и колку често купувате, кај нас онлајн купувањето сè уште не е навика“, истакна претседателката на Асоцијацијата за е-трговија.

Нејзина оцена е и дека приватните пошти имаат значаен раст во работењето, но мора да применат помодерни технологии за да го оптимизираат работењето и да ги намалат трошоците, како и да го подобрат квалитетот.  Недостигот од кадар, порача таа, може да се надмине со подобра технологија.

На 7. регионална конференција за е-трговија, која се одржува во Скопје, под мотото „E-commerce: Untangling Potential“, има над 700 учесници од дома и од регионот, претставници од водечки компании, меѓународни организации и академски институции.