Растат пензиите, но расте и бројот на пензионери со најниски пензии

Бројот на корисници на пензија до крајот на оваа година ќе надмине 350.000. Според планот на Фондот за пензиско инвалидско осигурување (ПИОМ) во декември 2026 година ќе има 351.676 лица кои примаат пензија.

Во однос на декември лани проекциите се дека бројот на пензионери ќе се зголеми за околу 3.000 лица или околу еден отсто. Најголем дел од новите корисници на пензија, околу 2.800, ќе бидат корисници на старосна пензија.

Понатаму, во планот на ПИОМ се наведува дека на крајот на оваа година вкупната просечна пензија ќе изнесува 27.522 денари. Во декември лани просечната пензија стигна до 27.167 денари.

Следното зголемување на пензиите ќе стаса со мартовската пензија. Тогаш сите пензионери линеарно ќе добијат по 1000 денари плус. Ова е четврто по ред линеарно зголемување на пензиите од 2024 година наваму. Првите две беа по 2500 денари, а вторите по 1000 денари. Или за две години сите пензионери добија 7.000 денари повеќе за трошење.

Нема да има пензии под 17.000 денари

И покрај критиките на експертската јавноста на напуштањето на формулата за усогласување на пензиите со растот на просечната плата и инфлацијата, власта останува на ставот дека линеарното зголемување е праведно.

Главниот аргумент го гледаат во зголемувањето на најниската пензија.  Пред линеарното зголемување од вкупно околу 330.000 пензионери, 150.000 добивале најниски пензии кои се движеа од 10 до 12.000 денари.

Со следното зголемување кое на сметките ќе легне со април, најниските пензии ќе се движат од 17 до 19.000 денари. Ваквото зголемување има придонес, според власта, и во намалувањето на стапката на сиромаштија кај пензионерите.

За над 9.000 лица е поголем бројот на корисници на најниска пензија

Податоците на ПИОМ за исплатени пензии во декември лани покажуваат дека најниска пензија до 19.228 денари примиле вкупно 26.495 лица.

Во однос на истиот месец во 2023 година, пред циклусот линеарни зголемувања на примањата, бројот на лица што влегуваат во оваа категорија е зголемен за 9.324. Или од 5.08 процентот на приматели на најниски пензии се искачи на 7,60 отсто од сите пензионери.

Најголем дел од пензионерите во декември, 126.430 лица или 36,25 отсто, зеле пензија од така наречената втора група која била во распон од 19.229 до 22.945 денари. Бројот на пензионерите кои ги добиваат вторите најниски пензии во овие две години е речиси непроменет. За околу 900 лица е зголемен бројот на пензионери со највисоки пензии од над 63.518 денари.

Највисоката пензија исплатена во декември 2025 година изнесувала 89.049 денари. 18 лица се корисници на оваа сума и сите влегуваат во категоријата старосна пензија.

Во декември 2023 година, највисоката пензија изнесувала 73.503 денари и ја користеле 75 лица, 71 лице имале старосна пензија, 3 лица семејна и 1 лице инвалидска пензија, покажуваат статистичките податоци на ПИОМ.