.webp){kind=icon}
Потрошувачите во САД сметаат дека моменталните услови за купување недвижности се најлоши во нивната генерација, бидејќи хипотекарните кредити растат како одговор на агресивната политика на Федералните резерви (ФЕД).
Приближно четворица од пет потрошувачи во моментов ги опишуваат условите за купување домови како лоши, што претставува рекорд во податоците од 1978 година, покажува истражувањето на расположението на потрошувачите, кое Универзитетот во Мичиген го спроведе месецов. Бројките покажуваат дека мнозинството луѓе како причина за лошите услови на пазарот на недвижности ги гледаат каматните стапки, кои се на највисоко ниво во последните 40 години.
Bloomberg Mercury
Пазарот на станови, кој е особено чувствителен на зголемените трошоци на задолжување, паѓа откако ФЕД почна да ги зголемува каматните стапки во настојувањето да ја заузди побарувачката во целата економија и на тој начин да ја скроти инфлацијата. Хипотекарните стапки се движат околу највисокото ниво во последните две децении, а минатата недела беа над седум отсто.
Истражувањето покажува дека ценовните услови за купување станови во ноември паднаа. Иако условите донекаде се подобрија од почетокот на годинава, сепак остануваат длабоко во негативното подрачје и значајно под врвот од средината на 2020 година.
Зголемените стапки не го оптоваруваат само пазарот на недвижности. Условите за купување трајни добра за домаќинство овој месец паднаа по скокот во октомври, а уделот на потрошувачите што рекоа дека условите за купување моторни возила се лоши поради дополнителните трошоци се искачи на највисоко ниво од 1982 година.
Главниот показател за расположението на потрошувачите од Универзитетот во Мичиген на почетокот од ноември се повлече на најниско ниво во последните четири месеци, додека очекувањата за инфлацијата пораснаа.
