По почетните песимистички изјави за економските очекувања за годинава, денешната порака од Светскиот економски форум во Давос е дека светската економија сепак покажува отпорност и дека инфлацијата забавува.
Меѓународниот монетарен фонд (ММФ) и натаму предупредува на тешка економска година, а во Европската централна банка (ЕЦБ) очекуваат дека монетарната политика ќе успее да се врати на посакуваната инфлациска стапка од два отсто.
Оваа година голема улога има закрепнувањето на кинеската економија. Кинескиот вицепремиер рече дека Кина ќе продолжи да се отвора кон светот. Тој во својот говор додаде дека Кина е сигурна дека нејзината економија оваа година ќе се врати на вообичаеното темпо на раст и дека очекува значаен пораст на увозот, корпоративните инвестиции и потрошувачката. Тој повеќепати ги спомена зајакнувањето на меѓународната соработка и зачувувањето на мирот во светот.
Инвестициски фонд од Абу Даби, вреден 284 милијарди долари, планира пренасочување на инвестициите во Азија, а раководителите очекуваат силно заздравување на кинеската економија.
За ЕЦБ е позитивен сигнал што инфлацијата во еврозоната го продолжува падот. Но базичната инфлација, која е значајна при носењето на одлуките, достигнува рекорд. Сепак, ЕЦБ прогнозира дека Европа може да избегне рецесија оваа година.
И покрај впечатокот дека светската економија покажува отпорност, остануваат предупредувањата од меѓународните финансиски институции дека 2023 ќе биде тешка година.
ММФ смета дека вкупната инфлација го достигна својот врв, но не и специфичните параметри што се дел од неа и на кои ќе треба да се внимава во наредниот период. Надлежните оттаму сметаат дека треба да се почека уште неколку месеци пред креаторите на монетарната политика да се опуштат сметајќи дека најлошото помина.
Извршните директори зборуваа и за бранот кратења на работни места, што, според нив, претставува своевидна корекција на масовните вработувања во одредени индустрии што драстично растеа во периодот на пандемијата.
Целосниот извештај од репортерите на „Блумберг њуз“ (Bloomberg News) за случувањата и заклучоците од панелите на Светскиот економски форум во Давос погледнете го во прикаченото видео.
.webp){kind=icon}
