.webp){kind=icon}
Цените на недвижностите во Сиднеј, предводник на австралискиот пазар, во февруари напредуваа за првпат по 13 месеци, што е позитивен знак за вредностите на домовите што беа под притисок од зголемените каматни стапки.
Цените во Сиднеј се искачија за 0,3 проценти во февруари, што е нивно прво зголемување од јануари 2022 година, додека Мелбурн и Бризбејн се лизнаа за 0,4 проценти поединечно, покажуваат податоците на „Кор лоџик“ (CoreLogic Inc). Поради тоа комбинираниот индексот за главните градови падна за 0,1 отсто.
Националниот индекс на вредноста на недвижностите на оваа консултантска куќа падна за 0,1 отсто, што е најмал пад од мај, кога централната банка на Австралија го започна циклусот на затегнување на монетарната политика.
Споредба на растот на цените и висината на каматите / Bloomberg Mercury
Зголемувањето на цените во Сиднеј беше поттикнато од недвижностите од повисока класа, што сигнализира можен пресврт на градскиот пазар, бидејќи сегментот има тенденција да води и подеми и падови, велат од „Кор лоџик“.
Австралискиот пазар на станови беше во застој во изминатите девет месеци, бидејќи централната банка го започна својот најагресивен циклус на стегање во последната деценија во обид да ја заузди спиралната инфлација. Централната банка ги изненади пазарите минатиот месец кога сигнализираше дека тоа сè уште не е направено и очекува дополнителни зголемувања.
Тим Лолес, директор за истражувања на „Кор лоџик“, изрази сомнеж дека враќањето на пазарот во Сиднеј ќе се прошири и во другите градови, велејќи дека последното стабилизирање на цената се совпадна со ниската понуда и порастот на одобрените аукции.
„Дали овој тренд на подобрување може да се одржи е многу неизвесно. Иако огласите во моментов остануваат ниски, може да видиме дека побарувачката за станови дополнително се намалува при повисоки каматни стапки и пониско расположение“, рече тој.
Централната банка на Австралија во февруари ја зголеми својата готовинска стапка на 3,35 проценти од рекордно ниските 0,1 отсто во мај лани, во обид да ја олади најжешката инфлација во последните три децении. Цените на пазарот на пари покажуваат стапки што годинава достигнуваат врв од 4,2 проценти, што укажува на уште најмалку три покачувања од четвртина поен. Лолес рече дека постојат добри шанси ова одложување во падот на домувањето да биде краткотрајно, со оглед на очекувањата за натамошни зголемувања на стапките заедно со стравувањата од слабеење на економијата.
Иако помалиот број огласи за недвижности помогнаа цените да не паднат премногу, сепак падот на расположението на потрошувачите поради повисоките трошоци за задолжување може дополнително да ја залади побарувачката и да предизвика уште еден круг пад на цените на недвижностите, сметаат од „Кор лоџик“.
