.webp){kind=icon}
Денешниот извештај за потрошувачките цени во САД најверојатно ќе покаже дека инфлацијата е забавена, најмногу благодарение на движењата на цените на стоките, според „Блумберг економикс“.
Извештајот ќе покаже дека базичната инфлација забрзала само за 0,2 отсто во декември, што е добро за Банката на федерални резерви (Фед) и нејзината борба против инфлацијата, посочија економистите Ана Вонг и Стјуарт Пол.
„Податоците од декември исто така треба да го уверат Фед дека процесот на дезинфлација се одвива по очекуваниот тек“, велат Вонг и Пол. „Празничните попусти и увезената дезинфлација од Кина веројатно доведоа до пад на цените на основните продукти, а растот на цените во услужниот сектор најверојатно забави“, пишуваат економистите во извештајот.
Во претходните месеци, падот на цените на основните продукти ја намали инфлацијата побрзо отколку што очекуваа пазарите и Фед. Растот што траеше од 2020 година до почетокот на 2023 година беше прекинат во јуни, а падот досега не запре.
Аналитичарите сега очекуваат омилената мерка за инфлација на Фед да ја заврши годината на околу 2,2 отсто - малку над целта на централната банка од два отсто. Ваквите проекции претпоставуваат поголема дефлација на стоките, одредено забавување на инфлацијата на услугите и намалување на темпото на поскапување на киријата.
„Во текот на изминатите шест месеци, инфлацијата во изнајмувањето станови се намали на нешто над пет проценти по годишна стапка. Тоа е сè уште многу повисоко од 2,5 проценти што ги имаше во просек од 2010 до 2019 година, но тоа значи дека има повеќе простор за намалување на инфлацијата“, велат Вонг и Пол.
„Достапните пазарни показатели, како што е процената на 'Јарди Матрикс' (Yardi Matrix) за неодамна договорените кирии, сугерираат дека инфлацијата на станбените објекти треба да се ублажи до 3,5 проценти до крајот на 2024 година“, додаваат тие.
Економистите на „Блумберг“ исто така изнесоа и неколку предупредувања.
„Нашиот став е дека базичната инфлација годинава ќе оди на три проценти наместо на два процента“, велат тие. „Дезинфлацијата на стоките најверојатно ќе забави во втората половина од годината бидејќи компаниите ќе завршат со продажба на вишокот резерви“.
„Блумберг економикс“ очекува вкупната инфлација да забрза за 0,2 отсто на месечна основа, што е идентично со средната вредност од анкетата на „Блумберг“. За разлика од тоа, тие очекуваат малку пониска стапка на базична инфлација од аналитичарите анкетирани од „Блумберг“.
