.webp){kind=icon}
Оние што се обложуваат дека Федералните резерви (Фед) ќе ги намалат каматните стапки во март можеби полагаат преголема надеж во историјата, велат некои стратези.
Банката на федерални резерви најчесто ги намалуваше каматните стапки околу шест месеци по последното зголемување, според податоците собрани од „Блумберг“, кои датираат од 1980-тите. Со оглед на тоа што од официјалните лица исто така се очекува да направат пауза во јануари, ова ќе биде една од најдолгите епизоди на високи каматни стапки.
Ваквите историски случувања, заедно со забавувањето на инфлацијата, можеби им даваат преголем оптимизам на инвеститорите, велат аналитичарите на банката „Сосиете женерал“ (Societe Generale SA). Излегува дека ова би можело да биде вистина, бидејќи обврзниците го забележаа најголемиот пад во последните два месеца во вторникот, откако Кристофер Волер од Фед рече дека ќе биде потребен внимателен пристап во намалувањето на стапките.
Инвеститорите во обврзници се подготвуваат за пресметка со Фед по уште една турбулентна година, а нивната претпоставка е дека забавувањето на економскиот раст и инфлацијата ќе ги натера официјалните лица да ги намалат стапките наскоро. Индексот на „Блумберг“ за американските обврзници падна за 1 отсто од почетокот на годината, што покажува дека постојат ризици што тежат на пазарот.
Просечно време на чекање по последното зголемување на стапката на Фед
Bloomberg
„Март е веројатното сценарио за монетарен пресврт“ за многу стратези, особено со оглед на историјата, рече Субадра Рајапа од „Сосиете женерал“. Сепак, таа во вторникот напиша дека намалувањето во март се чини прерано, откако официјалните лица изјавија дека постојат ризици инфлацијата да се забрза. Аналитичарите на банката очекуваат намалување дури во мај.
Приносот на 10-годишните обврзници падна за 12 базични поени, на 4,06 отсто, во вторникот, по коментарите на Волер.
Движењата на пазарот за своп-договори укажуваат на тоа дека шансите Фед да ги намали каматните стапки за 25 базични поени во март се околу 70 отсто. Во петокот своповите покажаа веројатност од 80 проценти, а некои инвеститори почнаа да ги подготвуваат своите портфолија за намалување од 50 базични поени. Целокупното позиционирање на инвеститорите покажува дека пазарот во голема мера ги игнорирал коментарите на Волер и неговите колеги.
Рајапа исто така рече дека облозите дека каматните стапки ќе се намалат во март може да бидат резултат на падот на таканаречениот базичен PCE индекс, кој ги мери цените на личната потрошувачка и е омилениот мерач за дефлација на Фед. Таа додаде дека постојат стравувања оти реалните стапки би можеле да станат рестриктивни доколку цените продолжат да растат побавно со вакви референтни каматни стапки.
Очекувањата на пазарот експлодираа откако претседателот на Фед, Џером Пауел, во декември изјави дека каматните стапки ќе паднат во 2024 година, според Прашант Њунаха од „ТД секјуритис“ (TD Securities). Тој очекува намалување во мај и вели дека Фед сака да води грижа за својот имиџ како независно тело и затоа првото намалување нема да се приближи премногу до изборите во САД.
„Брзината на промени во наративот на Пауел одигра голема улога во промената на позиционирањето на пазарот и подготовките за намалувањето на стапките во март“, додаде тој.
