„Ербас СЕ“ (Airbus SE) соопшти дека е во преговори да ѝ продаде на Саудиска Арабија повеќе воени авиони танкер „А330“, бидејќи нацијата сака да ги зајакне капацитетите на своите воздухопловни сили.
Земјата исто така размислува да го купи воениот транспортен авион „А400М“, според Жан-Брис Думон, шеф на „Ер пауер“ во „Ербас“. „Знаеме дека постои интерес за ’А400М’ и тоа ќе го решиме со саудиските воздухопловни сили и Министерството за одбрана“, рече Думон во интервјуто на маргините на саемот за одбрана што се одржува во Ријад.
Кралството веќе поседува шест „ербас A330 MRTT“, кои можат да се користат за полнење гориво во воздух или да се конфигурираат да носат војници или товар и да се користат за медицинска евакуација.
Разговорите ги води компанијата „Сами“, која е заедничко вложување на „Ербас“ (со 49 отсто) и воената индустрија на Саудиска Арабија. Портпаролот на „Сами“ (SAMI) не одговори веднаш на барањата за коментар.
Саудиска Арабија исто така е подготвена да нарача повеќе авиони „еурофајтер“ (Eurofighter) - заеднички проект помеѓу „Ербас“, „БАЕ системс“ (BAE Systems Plc) и италијанската „Леонардо СпА“ (Leonardo SpA) - на саемот за одбрана што започна во неделата и треба да трае до 8 февруари. Германија го отфрли својот приговор за продажбата на авионите во Саудиска Арабија минатиот месец.
Одделно, Саудиска Арабија исто така е во преговори со француската „Дасолт авијешн“ (Dassault Aviation SA) за купување борбени авиони „рафал“ и ги продолжи разговорите со САД за воспоставување поблиски одбранбени врски по паузата по почнувањето на војната Израел - Хамас во почетокот на октомври.
Градењето на одбранбената индустрија стана поитно бидејќи земјата се обидува да донесе инвеститори, туристи и некои од најголемите светски корпорации, а сето тоа е дел од амбициозниот план за трансформација на саудиската економија и намалување на нејзината зависност од нафта. Саудиска Арабија има еден од најголемите одбранбени буџети во светот, зад САД, Кина, Русија и Индија.
.webp){kind=icon}
