Индија стана втор најголем снабдувач на рестриктивните технологии за Русија, рекоа американски и европски претставници, нагласувајќи го предизвикот во напорите да се задуши извозот што ја поттикнува воената акција на рускиот претседател Владимир Путин.
Индискиот извоз на ограничените артикли, како што се микрочипови, струјни кола и машински алати, надмина 60 милиони долари и во април и во мај, што е двојно повеќе во однос на претходните месеци годинава, а во јули скокна дури на 95 милиони долари, велат официјални лица, кои побараа да не бидат идентификувани. Поголем снабдувач од Индија е само Кина.
Индиското министерство за надворешни работи одби да коментира за случувањата.
Прочитај повеќе
Кина и Индија: Судир на економски титани и каде да се инвестира?
Индија брза, но Кина води.
10.10.2024
Според најновите податоци, речиси една петтина од чувствителната технологија што влегува во рускиот воено-индустриски комплекс стигнала таму преку Индија, велат официјалните лица.
Новите податоци ја нагласуваат тешкотијата со која се соочуваат САД и нивните сојузници во обидот да ја намалат способноста на Русија да се бори во Украина веќе две и пол години откако почна инвазијата на силите на Путин. Извозот директно во Русија на повеќето такви артикли што всушност имаат двојна намена е забранет, па земјата почна да ги купува од трети држави, а понекогаш и од подружници на фирмите од Западот или од мрежи на нивни посредници што не се придржуваат до правилата.
Портпаролот на Стејт департментот вчера рече дека загриженоста расте и министерството повторно ќе разговара со индиските владини претставници и со компаниите.
САД и Европската Унија (ЕУ) најголем дел од своите напори за блокади ги фокусираа на списокот на технологии што се наоѓаат во руското оружје или се потребни за нивно производство.
Додека сојузниците работат на ограничување на некои од овие маршрути, Турција и Обединетите Арапски Емирати (ОАЕ) беа пресвртни точки, па се појавија нови центри. Тие ги вклучуваат Индија, Малезија и Тајланд.
Улогата на Индија во испораката на такви стоки претставува дополнителен предизвик затоа што креаторите на политиката на САД и на ЕУ сакаат да негуваат партнерства со владата на премиерот Нарендра Моди, иако тој негува врски со Путин. Индија исто така се појави како главен купувач на руска нафта и покрај сојузничките напори за ограничување на продажбата.
Улогата на Индија како претоварна точка во последните месеци ја стави во фокусот на агенциите за санкции на ЕУ и на САД. Официјални лица од тие земји досега неколкупати ја посетија Индија во обид да ги натераат властите да ги спречат пратките, а неколку индиски фирми се најдоа и под санкции од Западот.
Во јули заменик-секретарот за финансии на САД, Воли Адејемо, напиша писмо до официјалните лица од индиската индустрија, предупредувајќи за ризиците од санкциите со кои се соочуваат индиските компании и банки што имаат бизнис со руската воена индустриска база, пишува во писмото што „Блумберг њуз“ (Bloomberg News) го доби на увид.
.webp){kind=icon}
