Кина со нова одмазда - царини од 84 отсто за сите американски производи

Кинеското Министерство за финансии најави нови царини од 84 отсто на сите производи увезени од САД, кои треба да стапат во сила на 10 април.

Двете земји се вклучени во циклус на наизменични царини откога Трамп се врати во Белата куќа во јануари. Американскиот претседател сè уште не разговарал со својот кинески колега, претседателот Шји Џинпинг, повеќе од два месеца по неговата инаугурација.

Најновата кинеска реакција следува откако Трамп во својот последен потег ги зголеми давачките воведени за Кина на дури 104 проценти.

Така, американските царини кон Кина сега вклучуваат претходни давачки од 20 проценти поврзани со нелегалната трговија со фентанил, реципрочна царина од 34 проценти изведена од пресметка заснована на билатералната трговска размена, и дополнителни 50 проценти царина што Трамп ја најави откако Пекинг минатата недела објави дека ќе одговори со оданочување на американскиот извоз во Кина.

Приоритет на кинеските официјални лица е заштита на домашната економија од последиците. Земјата најави дека ќе ги тужи САД во Светската трговска организација. 

Фјучерсите на американските акции паднаа за околу 1,7 отсто откако Кина најави нови царини на американските производи, потег што дојде откако азиската земја вети дека ќе се „бори до крај“ со мерките на Трамп. Акциите во Европа паднаа за повеќе од 4 отсто.

Кинеските претставници неделава ја оквалификуваа одлуката на Трамп за ескалација на царинската војна како „грешка врз грешка“, но сепак го оставија отворен патот за дијалог со САД. 

Кинескиот извоз веќе се соочуваше со општи царини воведени оваа година, како и даноци од првиот мандат на Трамп и администрацијата на Џо Бајден.

Покрај царините, земјата разгледува сè поголем арсенал на алатки за да им возврати на САД.

Пекинг минатата недела најави дека ќе истражува една американска фирма и стави други американски компании на својата „листа на ентитети“, на кои ефективно им забранува да купуваат од Кина. Земјата исто така воведе лиценци за извоз на некои ретки минерали, што ќе ги ограничи пратките на краток рок.

Двајца влијателни блогери неделава предложија опции, вклучувајќи забрана за увоз на американска живина, ограничување на увозот на услуги и суспендирање на соработката по прашањето за фентанилот, што Трамп двапати го наведе како причина за зголемување на царините.

Во моментов нема коментари за веста. Биди прв да коментира...

Остави коментар