Трамп уверува дека нема намера да го разреши Пауел

Претседателот Доналд Трамп изјави дека нема намера да го разреши претседателот на Федералните резерви (Фед), Џером Пауел, и покрај неговото незадоволство што централната банка не се движи побрзо кон намалување на каматните стапки.

„Никогаш не сум имал таква намера“, изјави Трамп пред новинарите во вторникот. „Медиумите преувеличуваат работи. Не, немам намера да го разрешам. Би сакал да го видам малку поактивен во однос на неговата идеја за намалување на каматните стапки“.

Директорот на Националниот економски совет на Трамп, Кевин Хасет, во петокот пред новинарите изјави дека Трамп го проучува прашањето дали може да го отпушти Пауел по серија претседателски објави на социјалните мрежи и јавни коментари во кои Трамп ги критикуваше Федералните резерви (Фед).

Трамп минатата недела изрази жестока критика кон Пауел непосредно пред Европската централна банка (ЕЦБ) да ја намали својата референтна стапка за четвртина поен, на 2,25 отсто, што е околу половина од стапката на Федералните резерви од 4,25 - 4,5 отсто, при што во објава на Трут (Truth Social) посочи дека „отпуштањето на Пауел не може да се случи доволно брзо!“

Американскиот претседател постојано се жалеше дека Фед не ги намалува каматните стапки доволно брзо.

Трамп ја повтори таа критика и во вторникот, иако инсистираше дека контроверзиите околу неговите забелешки - кои ги потресоа пазарите - се преувеличени.

„Мислиме дека е совршено време да се намали стапката и би сакале да го видиме нашиот претседател малку да подрани со таквиот потег или барем да биде навреме наместо доцна“, рече Трамп.

Државните обврзници и доларот покажаа поголема стабилност во вторникот, бидејќи Белата куќа соопшти дека администрацијата напредува во преговорите за трговски договори насочени кон намалување на широките царини што ги најави претходно месецов. Додека приносот на 10-годишните државни обврзници едвај се помести, двегодишните приноси се зголемија на 3,82 отсто по слабата побарувачка на аукцијата.

Пауел и неговите колеги ги задржаа каматните стапки непроменети годинава, откако ги намалија за цел процент во последните месеци од 2024 година, додека чекаат да видат како економијата ќе реагира на политиките на Трамп, даночната реформа, дерегулацијата и имиграцијата.

Повеќето официјални лица на Фед изјавија дека политиката е во добра позиција во моментов и треба да продолжи да врши притисок врз економијата за и натаму да ја лади инфлацијата, која четири години е над нивната цел од два отсто.

Американската економија минатата година порасна со здрави 2,8 отсто, но економистите сметаат дека царините ќе предизвикаат забавување подоцна во 2025 година. Додека Фед традиционално би ги намалила каматните стапки за да се обиде да ја поддржи економијата во таква ситуација, Пауел и некои од неговите колеги сигнализираа дека централната банка можеби ќе треба да го приоритизира инфлацискиот аспект на својот мандат поради загриженоста дека давачките ќе ја разгорат инфлацијата.

Во моментов нема коментари за веста. Биди прв да коментира...

Остави коментар