Забавува економијата во Кина, намалени прогнозите за раст во 2023

Кога станува збор за кинеската економија, економистите се' почесто заземаат „мечкина“ позиција, намалувајќи ги изгледите за економски раст за 2022 година. Поради проблемите на пазарот на недвижнини и растот на бројот на инфицирани со корона вирусот, аналитичарите гледаат ризик на почетокот од следната година.

Анкетираните економисти на Блумберг очекуваат дека кинеската економија ќе оствари раст од само 3,5 отсто годинава, што е уште помалку од претходното надолно ревидирање на прогнозите за раст од 3,9 отсто. Исто така, се намалува проекцијата и за раст во првите три квартали следната година, иако очекувањата за раст во цела 2023 година остануваат непроменети, на 5,2 проценти.

Ова покажува дека економистите не се убедени дека неодамнешните чекори на Пекинг за стимулирање на економијата ќе можат да го запрат економското забавување, иако Централната банка ги намали каматните стапки, а се интервенира и преку пакет мерки со директно вбризгување на над 43 милијарди долари во економијата. И натаму постои ризикот од намалување на проекциите на раст поради пазарот на недвижнини, како и поради можни нови рестрикции за заштита од корона вирусот.

Деловното и расположението на потрошувачите претрпе голем удар годинава бидејќи големите градови, како Шангај, го ограничија движењето и затворија бројни фирми на подолг временски период, со цел да се спречи ширењето на корона вирусот. Тоа што дополнително ја влошува состојбата е кризата со недвижнините, сектор каде ситуацијата годинава е уште полоша бидејќи купувачите ја бојкотираат исплатата на хипотеките, поради што зградите уште не се изградени. Неодамна беа регистрирани и рекордно високи температури, како и суши, што предизвика недостиг од струја и затварање на одредени фабрики.

Кинеската влада првично постави цел за раст на Бруто домашниот производ (БДП) од 5,5 отсто за годинава. Меѓутоа, наглото забавување на активностите во текот на годината и новиот бран на корона вирусот ги наведе надлежните да ги намалат прогнозите. Пекинг никогаш толку не ја утнал целта за раст на БДП, освен кога се појави првиот бран од пандемијата во 2020 година.

Според зборовите на Рејмонд Јенг, главен економист од компанијата Greater China at Australia & New Zealand Banking Group Ltd, поради моменталните предизвици со кои се соочува кинеската економија, како и поради демографската криза, во наредните неколкуу години растот ќе биде под 5 проценти.

„Мислиме дека стареењето на популацијата ќе се одрази врз економијата“, изјави Јенг додавајќи дека потенцијалниот раст ќе продолжи да забавува меѓу другото и поради недостигот од подобрување на продуктивноста. „Мислиме дека растот на БДП во 2023 година ќе изнесува 4,2 проценти, а во 2024 година ќе биде 4 проценти“, прогнозира Рејмонд Јенг.

Во моментов нема коментари за веста. Биди прв да коментира...

Остави коментар